محمد سقراط- كود

—

واخا كنتفرجوا فيه بزاف حسب الإحصائيات ، واخا كنهدرو فيه تقريبا النهار كامل ، واخا كاين كروبات فالفايسبوك غير عليه ، واخا كنعايرو بيه ، واخا كنمارسوه ، وواخا كنتكاثرو غير بيه ، إلا أن الجنس كيبقى طابو فالمغرب ومشوه فالذهنية ديال العديد ، وواخا بزاف كيمارسوه عضويا إلا أنهم مكبوتين منو ذهنيا ، لدرجة ولا كيتخايلو تلميحات جنسية فأي حاجة شافوها ، وولات اللغة المتداولة والعادية بين الناس يمكن يقراو فيها عدة تلميحات جنسية ، حيث حتى القاموس الجنسي ديالنا كمغاربة فقير بحكم التحفظ لي عرفو الجنس فالذهنية المغربية ، وكتلقا عدة كلمات كتقال لحاجات خرى وفنفس الوقت عندها علاقة بالجنس .

وحتى ملي دخل الانترنيت وتوقع البعض أن الجيل لي كبر فهاد النعمة ربما تكون توفرات ليه معلومات كثر وكون ثقافة مزيانة حول هاد الموضوع ، ولكن للأسف كنلقاو جيل على قدو كل ما يعرفه عن الجنس هو البورنو ، وبالنسبة ليه المرة خاص تكون بحال آسا أكيرا والراجل بحال روكو سيفريدي ، والممارسة تكون بحال داكشي لي كيشوفو ، والرجل الفحل هو لي كيمارس بحال جيمس دي والمرأة الفحلة هي لي كتلوى بحال ناعومي راسل ، وفعوض الأنترنيت تكون حل زادت مرضات شعب كان أصلا مريض من هاد الناحية وخلطات ليه الثقافة الجنسية مع الصناعة الإباحية ، وهادشي نتاقل حتى للغة لي كنعبرو بيها على الجنس ولي ولات مافيها حتى شي جمالية وفيها عنف مبالغ فيه ، مكاين غير شرشمتها ، حردتها ، قلبت ليها الوالدة ، قست ليها الكرون ، سخفتو ، هلكتو ، كنت غنقتلوا ، مابقيتي تعرف واش هاد الناس كيهدرو على الجنس ولا حرب أهلية هادي .

لدرجة ولا بنادم يقدر يقول شي حاجة عادية  ويتم تأويلها جنسيا ، كيما دارت سارة أبوجاد ملي قالت أنها كيعجبها تمصو وراجلها كيعجبو يلحسو وكانت تقصد لاكلاص طبعا بحكم ما نعرفه عن هذا الكوبل من دماثة وخلق طيب وارتجالية ، لكن بزاف ديال ديال الناس تهجموا عليهم فالتعليقات وأساؤو الظن بهم ، وطبعا هادا موشكيل ديال المغاربة لي ولاو كيعتابرو أي حاجة تلميح جنسي بحكم هاد هوس الجنس لي ولا مسيطر على الأدمغة ، وهنا فين بصح خاص يتم تدريس الثقافة الجنسية فالمدارس باش على الأقل بنادم يهرس الطابو ويولي قادر يفرق بين حريث الفول والبورنو ، ويطور لغة ومفردات خاصين بالجنس ماشي يتم اقحام مفردات حربية لوصف العملية الجنسية وباش مايبقاش أي واحد هدر على راحتو فشي موضوع وستعمل كلمات معينة يتسمى راه كيعطي تلميح جنسي .