محمد سقراط- كود

—

مشهد ديال مقدم كياخد لبائع متجول سلعتو هو مشهد جد عادي عند المغاربة ، مشهد قايد ولا مقدم كيحكرو بائع متجول ويقلبوا ليه سلعتو حتى هو مشهد جد عادي ، مشهد مي فتيحة شاعلة فيها العافية وكتمرغ فالباب ديال القيادة من بعد متكرفصو عليها المقدم والقايد حتى هو مكان مشهد مؤثر كافي باش يسخط المغاربة

وليوم شفنا مشهد مقدم كياخد لمرة كبيرة سلعتها وهي تابعاه كترغب فيه وباغا تحيد ليه قفافها ، قبل مايوصل لسيارة القوات المساعدة ، وفواحد اللقطة كتشد هي قفة وهو كيجبد بالجهد باش تطلقها حتى كتطيح كتجي على وجهها ، وهذا مشهد فيه الكثير من الحكرة لي من المنطقي يكونوا المقدمين والقياد والقوات المساعدة كيتجنبوها بحكم الحوادث الكثيرة لي وقعات فالمغرب ديال حرق الناس انفسهم احتجاجا على الحكرة.

ولكن فمشهد بحال هذا بحال الى كيقولوا للمغاربة واخا تحرقوا راسكم كاملين الحكرة غتبقى ومعندكم ماتديرو ، ويمكن لأي واحد كينتمي للمخزن والدولة يمارسها وماشي غير فحق الباعة المتجولين بل فحق المغاربة كاملين بمختلف طبقاتهم من غير الطبقة الآمنة لي قريبة لدوائر القرار ، وأي واحد خارج هاد الطبقة معرض للحكرة وبطرق مختالفة لدرجة واصلة الحكرة حتى للمغاربة المقيمين بالخارج لي فين مكيكون الملك فشي دولة كيتعرضو ليه برسائل الشكاوى ، حيث عارفين أن لا حق لهم هنا ، وأنه بلا تدخل شي سلطة عليها أو الملك شخصيا عمرهم يشدو حقهم ، وفعوض يكون القضاء هو السلطة الحقيقية لي كتنصف المواطن ، للأسف القضاء حتى هو جزء من الحكرة لي كتمارس على المغاربة ، وغير مؤخرا حرقات مرة راسها فتارودانت احتجاجا على حكم قضائي .

يقدر يكون مازال عادي هادشي عند المغاربة وبحكم أنهم تعايشوا معاه سنوات فغادي يكونوا تطبعوا ، ولكن راه تعايشوا معاه على أمل أنه ماغاديش يبقى أو على الأقل غير ينقص ماشي يزيد ويولي واقع حتمي غير قابل للتغير خاص المواطن يتعايش معاه بفكرة أنه أزلي ، هادشي راه كيقتل الأمل وحب الوطن والثقة فالنخب والتغيير وأي حاجة جاية من جيهة الدولة وكيتراكم وراه مكيتنساش ، على خلاف مكيظن البعض ومثل هاد السلوكات راه ماغادا بالبلاد لفين خصوصا أنها ولات كتوثق بالفيديو وكيشوفوها لمغاربة كاملين ، راه هاداك ماشي مقدم حكر مواطنة راه دولة حكرات مواطنة خصوصا فحالة ماتمش عقاب هاداك السيد .