محمد سقراط كود ////

مبارك أيها الحراك المقدس، مباركة أيتها الحسيمة الطاهرة، مبارك أنت أيها الريف المبجل، مباركون أولائك الشباب الذين حجوا من كل حدب وصوب ليصدعوا بكلمة الحق، مباركون أنتم الذين تحديتم الحواجز الأمنية ، مباركون أهل الريف المفجوعون وولادهم فالحبس ، مبارك كل من تعاطف وساند الشعب ضد الفساد ، مبارك هذا اليوم العظيم الذي سيصير عيدا للوطنية ولحب الوطن ، مبارك كل من سيحتفي اليوم فالحسيمة بإرادة الشعب ، مباركون رجال الريف ونسائه الذين لم يتركوا دم محسن فكري يذهب هدرا، كدماء العديد من المغاربة الذين طحنهم الفساد.

مايقع اليوم فالحسيمة هو مصالحة الشعب مع نفسه وثقته التامة بأنه ممكن ليه يغير الوضع الراهن بالصمود والثقة فعدالة القضية ، هادي ماشي مجرد مسيرة هذا عرس مغربي كيبين أن المغاربة لم يستسيغوا الخضوع بعد ، وأنهم رافضين للفساد وهادي هي الإرادة الشعبية الحقيقية ماشي هاديك لي كان كيتغنى بيها بنكيران فكل فرصة ، ليوم الشعب أعلن القطيعة مع الرضى بالفساد ، والثقة فالوعود السياسية الكاذبة ، الشعب بغا يشوف قرارات حقيقية كتبين أنه كاينة ارادة عند الدولة لوضع حد للخلاف ، عبر اطلاق سراح المعتقلين ، وتنفيذ مشاريع اجتماعية لتنمية هاد المنطقة وعلاش لا المغرب كامل ، أييه كاينة مشاريع ولكن غارقة فالفساد وكيستافدوا منها غير النافذين ومكيوصل للمواطن البسيط منها والو ت واخا هي فالأساس تدارت لإنعاش الإقتصاد فالمنطقة ، وفاللخر كتلقاها انعشت جيوب المسؤولين ولوبيات العقار والفاسدين .

كلنا فواحد الوقت كنا فرحانين بالمشاريع الكبرى وبتواريخ انجازها وحسينا بأنه غتزوهر القضية ، وفالواقع تزوهرات ولكن ماشي للشعب ، الشعب بقات كتجي فيه الدقة تابعة الدقة ، وحتى لي ستافد فراه فاللخر لقى راسو خدام بالحد الأدنى للاجور بلا تغطية صحية بلا مدرسة عمومية عالية الجودة فين يقري ولادو ، غارق كريديات ، غادي للهاوية ، وفنفس الوقت كيشوف ناس خريين من تقربين من السلطة كيراكموا الثروات بالفساد والمحسوبية وبدون مراقبة حقيقية وزجرية من قبل الدولة أو ممثلي الشعب فالحكومة ، حتى لقا الشعب راسو عريان وكيزيد يتكشط عام على عام وولادو كيموتوا مطحونين ، هاعلاش حراك الريف راه حراك كل المغاربة وقرصة اذن للدولة باش تجمع راسها معانا راه بغينا نعيشوا حتى حنا .