سهام البارودي- كود

—

حسب منظمة ” مراسلون بلا حدود” لي كادير كل عام كلاصمو ديال حرية الصحافة فبلدان العالم ! المغرب هاد العام مكلاصي فرتبة مشرفة الحمد لله ! هوا الثاني من بعد النرويج كايحتارم حرية الصحافة و الولوج للمعلومة ساهل و ماكايجريش على الصحافيين الأجانب.
لا بلاتي، سمحو ليا غلطت ،ماشي المغرب هوا الثاني ! السويد هي الثانية ! الزربة خايبة خصوصا فاش كايبقا نجيم يدير ليا الطيارة باش نسيفط المقال نسيفط المقال ! هانتا آ نويجيم كنتي غاتخرج عليا دابا و نبدا نشير فالأرقام، بلاتي نقلب على المغرب مزيان!وا تانا نيت سري! ماكانحشمش غادا كانقلب على المغرب حدا النرويج و السويد و الدانمارك بوجهي حمر شو الضسارة كي دايرة! بلاتي نزيد نهبط شوية فالكلاصمو، ألمانيا 16 , البرتغال 18 طبعا أنا ماطامعاش نلقا المغرب مع ألمانيا عاوتاني، رحم الله عبدا عرف قدر نفسه آ خويا، زيد زيد زيد …. اللائحة طويلة ! و هاد الساعة كايبانو ليا غي دوك الدول لي أصلا واعرة علينا و مايمكنش نتقارنو معاها! همممم صافي حبس! لقيت ناميبيا الرتبة 24 , غانا الرتبة 27 , حاسة بلي مابقا والو و نلقا المغرب! وايلي ناميبيا فالرتبة 24 و حنا مانكونوش حداها مايمكنش!! افريقيا الجنوبية الرتبة 31 ! العدو اللذوذ ديالنا فالقارة السمراء لي دا لينا التنظيم ديال كأس العالم فألفين و ستة مكلاصي فالرتبة 31 فحرية الصحافة و حنا مازال مابغينا نبانو فهاد الكلاصمو مايمكنش ؟! بان ليا هادشي طويل مازال و المغرب مابغاش يبان فاللائحة ! زيد زيد زيد زيد آ حميد ! ها هوا ! Maroc ! مجبد بكل فخر و اعتزاز فآخر اللائحة فالرتبة 133 من 180 دولة ! تبارك الله تبارك الله تبارك الله ! فوق منا الكومبودج و تحت منا الجزائر غي النقيلات فهادشي ديال الحرية و الحقوق !الكاميرون و الزيمبابوي مكلاصيين احسن منا ! كون صحابني القضية حامضة تال هاد الدرجة كون بديت اللائحة من قزيبتها.
و لكن فاش كانقرا فالأخبار بلي الصحفي المهداوي تشد و ضربوه بثلت شهور ديال الحبس بشي جريمة سميتها ” الصياح” كانفهم علاش ديك الرتبة 133 جبناها بدراعنا الحمد لله و عن جدارة و استحقاق !

المهداوي نقدر نتافق معاه و لا نختالف معاه كايبقا صحفي عندو غيرة على البلاد و فاش كايهضر كانحس بواحد الصدق فهضرتو ، ماشي مرايقي كايغمس و ساكت ! يقدر يولي كايغمس واحد النهار فحال بزاف كانو كايخبطو الطبالي و نهار داقو من المرقة رامو للحيط و لكن لحد الآن داك السيد كايجيني عندو غيرة و نفس على البلاد هاز الهم لي هازينو بزاف د الناس و ساكتين عليه، ماكاتحبسش عندو الخدمة ديال صحفي في نقل الخبر و كفى بل كايتناقش و كايهضر و كايعطي رأيو على الأحداث بواحد الغيرة لي قليل فين كاتشوفها فالصحفيين.
نقدرو نختالفو معاه ! نضحكو على دوك الخلفيات لي كايختار باش يدير الفيديوات ديالو ها جردة مردوخ ! ها المرجة الخانزة ديال القنيطرة ها غابة معمورة ! نقدرو نتكومكو على ديك الجملة الشهيرة ديالو ” زوار موقع بديل مرحبا بيكم …”
و لكن تاواحد ماغادي يختالف على مسألة انه المهداوي كايهضر و كايدافع من نيتو على القضايا لي كايآمن بيها
Il dit tout haut ce que pensent beaucoup de personnes tout bas
واش المهداوي زعما غاتجيه صعيبة يضرب الطم ؟
يغمس فالمرقة ديال الاشهار و يلحس الكابة لهاد الوزير و لهاد الرئيس و يدير تاهوا الخواطر ؟!
واش صعيبة فالمغرب تسكت و دير عين ميكة و دخل سوق راسك ؟!
طبعا ماشي صعيبة ! ماشي صعيبة تكون صحفي باغي غي تغمس فالمرقة و صافي و تعمر السيت ديالك ب”عاجل شاهد بزازل هيفاء وهبي ” ” حصري :شاهد صراع دنيا بطمة و ابتسام تسكت ”
حشومة نشدو فحال المهداوي و نلوحوه فالحبس مع المجرمين و القتالة و المغتصبين و الشفارة ! حشومة يولي الصحفي مقموع حتى لهاد الدرجة.
شنو دار گاع هاد المهداوي فملك الله باش يتشد و يمشي للحبس ؟!
خرج فمظاهرة ! غوت مع الناس ! تخشا وسط محتجين و ساندهم!؟ و من بعد ؟! واش ديك الرتبة 133 مابقاتش قادانا باغين نزيدو نتنافسو مع كوريا الشمالية على الرتبة 180 ؟