كود عادل المكناسي وهناء ابو علي /////

المغرب فهاد الماتش ديال مجلس الامن بخصوص قضية الصحراء هاد الاسبوع بحال بحال شي فرقة خاسرة ب3 لزيرو وما بقى والو ويصفر الحكم او الحكام. احد هاد الحكام الولايات المتحدة الامريكية اللي وجدات قواعد الماتش. المغرب كان غادي يتعرض لعقوبة اممية وادانة دولية ويخضع لشروط مجلس الامن. يعني مقودة بزاف. لكن المغرب فالماتشات اللي كيكون قريب يخسرهم كيولي بحال المانيا فالكورة. تقدر تبدل النتيجة فاخر دقيقة وتخرج رابحة.

الاوراق اللي لعبهم المغرب واضحة وذكية. شاف الماتش مشى من يديه طرد المكون المدني السياسي ديال المينورسو. خلق ماتش اخر من غير ماتش قرار مجلس الامن. توجد فالاول قرار الادانة. بقى مستعمل هاد الورقة وكيكوي ويبخ. مشكلتنا ماشي مع مجلس الامن =15 عضو اللي كيصوت على التوصيات= بل مع الامانة العامة للامم المتحدة اي =بان كي مون ومبعوثه الشخصي ومن يتحركون معهم=. طبعا هاد لكلام ما عندو معنى ايلى ما كانش وراك اصدقاء صحاح.

فرنسا وقفات وقفة واعرة مع المغرب ودافعات على موقفو حتى خروج القرار واسبانيا اللي صحفها واحزابها مع البوليساريو ديما معانا فقرارات مجلس الامن. حتى هي كانت معانا. طبعا بلا ما نتحدث على اشقاء بحال السينغال ومصر. فرنسا طلبت من المغرب وفق معطيات حصلت عليها “كود” يسكت شوية ويخليوها دير شغلها. ما بغاتش التصعيد والتشويش. دارت شغلها.

خطاب الملك محمد السادس في القمة الخليجية المغربية بالرياض كان اكثر من مهم. الملك طلع معلم. دار خطاب قوي بزاف ولكن ماشي الخطاب وحدو كافي كان خاص يدعموه قادة الخليج كلهم وهاد الشي اللي كان. وقفو مع المغرب ومع “مغربية الصحراء”. هادي خربقات لوراق. تجمع كبير ووازن بحال الخليج يقولها علانية حنا مع المغرب في السراء والضراء كيفما المغرب معاهم ومستعد يدافع عليهم بجيشو.

ماشي صدفة بل تخطيط ان القمة المغربية الخليجية جات قبل زيارة اوباما بساعات للسعودية ولعقد قمة خليجية امريكية. كنعقلو باللي فؤاد عالي الهمة مستشار الملك وناصر بوريطة الوزير المنتدب في الخارجية مشاو للرياض وتلاقاو بالملك سلمان وهاد الشي باش يخططو لقمة تكون نتائجها انية على قضية الصحراء. حسب مصدر ديبلوماسي مغربي ل”كود” فالخليج لعب دور اساسي وكان من اسباب تراجع او تليين الموقف الامريكي بالاضافة الى الدور الفرنسي. قنعو اوباما باش يبدل موقفو. اميريكا دولة مصالح. شافت باللي مصالح كثيرة مهددة مع دول الخليج خاصة ان العلاقة بيناتهم دابا خايبة وتشبتثها بموقفها من الصحراء غادي يزيد يبعد الطرفين.

جماعات الضغط حتى هي لعبات دور فهاد الشي، خاطئ من يعتقد ان الادارة الامريكية يمكن ان تغير موقفها بدون تحركات جماعات الضغط. مراسلات بين اعضاء فالكونكريس وبين نائب كيري المكلف بالموضوع من اجل دفع واشنطن الى تغيير موقفها. يعني كانت حقا معركة قاصحة بزاف.

هاد الشي بلا ما ننساو الدور الكبير اللي لعبو الوزير المنتدب فالخارجية ناصر بوريطة. السيد اللي فاهم موضوع الصحراء احسن بزاف من الوزير الفعفاع صلاح الدين مزوار بان دورو حتى فتقرير الامين العام بان كي مون اللي كيكول باللي مزوار دار خطآ باش قال المغرب ما بقاش يسمح لكريستوفر روس المبعوث الاممي باش يزور الصحراء. كالها لوكالة ايفي الاسبانية للانباء. بان كي مون اضاف ان بوريطة صحح الوضع.

بوريطة وجد القمة المغربية الخليجية وتحرك فالجبهة الروسية واخا ما خرجش بشي نتيجة ما عدا تبقى روسيا محايدة وكان المشرف على الملف رفقة الممثل الخاص للمغرب في الامم المتحدة عمر هلال اللي حتى هو لعب هاد الماتش مزيان. بوريطة وهلال وديبلوماسيون اخرون عرقو التوني وتقاتلو بزاف. دابا اش من دور باقي للوزير الفعفاع صلاح الدين مزوار بعد هاد الماتش الصعيب؟