سهام البارودي كود///

هاد ليامات بنادم مشغول بالاحداث لي وقعات فالمغرب، ها الصايات ها المثلي ديال فاس ها مرتضى منصور ! الحداثيين من جهة و الرجعيين من جهة و الشاب يونس بني ملال من جهة اخرى ! كلشي مشغول لدرجة خلينا السي شباط يدير خرجة اعلامية هيتشكوكية بلا تاواحد مايديها فيه و فاطار الجديد لو جدة و البالي لا تفرط فيه راه مايمكنش نخليو شباط يبان فالتلفزة و يهضر بلا مانعلقو عليه حيت الدوام هادا و مرتضى منصور غي دايز … الشباط هو لي غايدوم لينا و غايتحفنا بالخروج الاعلامي ديالو و ما تيسر من البونيات …

7 دقايق من برنامج “ضيف الاولى” كانت كافية باش نفهمو انو بالنسبة لشباط الحوار حول الحداثة و الحريات الفردية و هادشي ديال العيالات يلبسو لي بغاو ! و ماشي من حق الهايش مايش يدخل باش يسلخ واحد مثلي فالزنقة… هاد البلا بلا كاملة لي منوضة الصداع هاد ليامات بالنسبة لسي شباط راه”نقاش جانبي”! سمح لينا اسي الشباط و لكن راه ماشي نتا لي كاتحدد شنو هو النقاش الجانبي و مايمكنش احداث خلقات ضجة و حراك تجي نتا و تضربها فالزيرو هاكا ! و لكن نقدرو نفهمو المنطق ديال سي شباط حيت يمكن السيد مزروب هاد الايامات مع نتخابات قربو و عارف هاد القضايا ديال الحرية و الحداثة و الديموقراطية ماكلتوكلش طرف د الخبز مع بنادم لي كايصوت ! شباط انسان برغماتي عارف بيلي لا بغا يعجب “الاغلبية” راه خاصو يدوي على البطاطا و خيزو و الثمن د ليصانص و شوية د التعليم و السبيطارات لي خانزين و بنادم لي ماكايلقاش باش يداوا … هادو هوما المواضيع لي كايعجبو بنادم و هادي هي الوصفة السحرية باش بنادم يصوت عليك راه بصح لاجيتو تشوفو ماعمر شي مرشح مشا لشي درب و قالهم “و غادي نوفرو ليكم هامش حرية اوسع! و غادي تعيشو بطريقة حداثية ” لا ديما ديك اللازمة ديال “غانسرحو ليكم القوادس !غانزفتو ليكم الزناقي” هي لي كاتوكل طرف د الخبز مع البشري!الاسبقية للزفت و القوادس و بالنسبة للحداثة و الحريات رخاها الله لا مادويناش فيهم هاد العام ندويو فيهم العام الجاي … هادشي نقدرو نفهموه من طرف مرشح بسيط كايدير الخطاب ديالو فشي دوار من الدواور ! و لكن السيد رئيس حزب و يقدر شي نهار يولي رئيس حكومة و ماباغيش يندد بالعنف لي تعرض ليه المثلي و ماباغيش يهضر على الواقعة ديال الصايات مزير كايضرب الحساب لشحال من صوت غايخسر وشحال غايربح ! راه خاصو يعرف بيلا مايمكنش نسبقو بطاطا على الحرية الفردية ف 2015! و ماشي العام لي جا يلقانا كانأجلو الحوار على الحريات و الحداثة بدعوى انو كاين شي حوايج اهم …تايفوت الجفاف عاد نهضرو! تايرخاص ليصانص عاد نهضرو ! تانسكنو الناس كاملين فالديور و يوليو كلهم يفطرو بدانون و كيكة عاد نهضرو …واش يصحابكم المغاربة دراري ماعاقوش بالفيلم!

النقطة الثانية لي السيد ولا باغي يلعب بيها حيت العدالة و التمنية لعبات بيها و صدقات ليها العملية ! هي الدين ! و بدا علينا” هادي مؤامرة دولية” فين بانت ليكم المؤامرة الدولية فانزكان؟ سي شباط لا عندو معلومات على شي منظمات دولية تاتفرق الصايات على البنات يعلمنا تاحنا راه بغينا حقنا د الحوايج ! و لا كاينة شي منظمة دولية طلقات دوك الدراري ففاس على داك المثلي يسلخوه يعلم بيها البوليس راه كاين المخزن فالبلاد ولا حنا غي كانحصلو و كانبقاو ندورو عويناتنا و نلصقو الكبت و الفقر و الجهل لي عندنا فبلادنا فالمنظمات الدولية… تا لاش غايتآمرو علينا لاش؟ كانصنعو البينيسيلين ! والو خلاها الميلودي مادرنا والو مابغينا والو… هوما لي كالو!

لي تفرج فالبداية د الحلقة غايبان ليه شباط كايضارب باش يبين انو حزب اسلامي ! ديك القضية ديال راه تاحنا اسلاميين و ضاربنا النفس على الدين و تاحنا فحال العدالة و التنمية صوتو علينا احمباكم! و من بعد ا سي شباط و من بعد ؟ واش غانبداو نتزايدو على شكون اسلامي كتر من لاخور على حساب مستقبل البلاد؟ ياكما نضمو ليكم شي مسابقة تجويد القرآن نتا و سي بنكيران و لي جود احسن نعطيوه مصحف و تسابيح و رئاسة الحكومة كادو؟ راه عارفين الدين وصفة سحرية باش تجيبو الناس يصوتو ! الخبز و القوادس و الدين صافي هادشي لي قدركم عليه الله! وا نعيطو على علال القادوس و نتهناو لاش نلبسو الكرافاطات و نمشيو للتلفازة باش نتناقشو .. الاحزاب السياسية غرقات فالشعبوية القادوسية و ولا كلشي كايتعاند مع كلشي !طاحو على الوصفة السحرية ديال كيف يصوت عليك 30 مليون مغربي في تلاتة ايام بدون معلم و بداو شي كاينقل من شي و شي باغي يشبه لشي … الحاصول ماننساوش راه المعاندة فالحزاق كاتخري …