نهضة بركان غيمشيو من مطار الجزائر للوطيل يرتاحو والكاف عطاهم ضمانات على التونيات
كود هند لكلاوي مراكش //////
مضاربة وصداع وغوتة فمهرجان مراكش الدولي للفيلم فدورته 16 على حساب “كسوة” ماشي فيلم. نكولو ليكم اش واقع. واحد السيدة كتكذب قالت باللي صحافية وما عمرها كانت ودابا كاليك ولات كتنصح الناس كيفاش يلبسو جابها راديو بلوس” امس الاثنين فشي برنامج. السيدة بغات تصفي حسابها مع عشيرتها اللي كانت خدمات معاها. كالت باللي ليلى حديوي اللي حتى هي كتقول انها صحافية وخدامة فهاديك الشوهة ديال “صباحيات دوزيم” اللي بهدلات بالبلاد كلها٬ لبسات كسوة ديال شي مصمم فرنسي اسمو كريستوف كيرمي. بلاتي نكمل. هاد حياة كالت يا سيدي باللي هاد الكسوة دازت فالطابي روج هادي 3 سنين وكانت لابساها ممثلة فرنسية. بلا ما نهدرو على الجانب المتعلق بهدرة الحمام حقاش هاد حياة اللي عودات شحال من مرة باللي كانت صحافية وهاد الشي كذوب فكذوب حياتها كلها كوميرسيال واللي خدم معاها كيدوز مدة قصيرة كيقلب عليها. هادو صحابات باش ما بقاتش خدامة معاها سباتها. حياة دارت فيديو كتبرر وكتكول باللي حديوي اتصلت بيها ومقلقة.
هادا هو فيلم مهرجان الفيلم الدولي اللي عندو 16 سنة. موضوع كان يكون عادي فمهرجان “كان” او “البندقية” او سهرة الاوسكار…. حقاش هاد المهرجانات وهاديك السهرة كاين الاساسي السينما. حتى دارو لوتاد بالسينما عاد ولى مهرجان السينما اللي كلشي علامات الموضة كتنافس تلبس النجمات. دابا مهرجان عندو 16 عام وهاد العام ما كاينش فيلم مغربي فالمسابقة الرسمية ومازال مضاربين مع الفرنسيس المحكمين فينا فكلشي والحدث هو لبسة حديوي. لاحظتو كلشي مزور. اللي ماشي صحافية كيدعي انها صحافية واللي ديال السينما ولى ديال شوفوني.
هاد الشي وصلنا ليه فيصل لعرايشي وصارم الفاسي الفهري. بجوج نائبا رئيس مؤسسة مهرجان مراكش المنظم للمهرجان.
نعاودو نكولوها مزيان هاد الشي ديال اللبس غير خاصو ماليه ماشي المدعين اولا وخاصو يكون باش يتحقق الحاجة الاولى هو السينما. نهار مراكش يولي فيه السينما ديال بصاح ندوزو لهاد السينما ديال هاد التخربيق