نبيلة شرف-كود

—

هنا فالبورديل ماكاينش لي يعايرك بالماضي ديالك حيث كلشي عندو نفس الماضي ونفس الحاضر، حتى من القوادة الكبيرة براسها ماتقدرش تعايرك ولا تقوليك شي كلمة تجرحك، أصلا حنا ماكانجيو بهاد البلاصة حتى كانكونو سالينا بلاصة الجرح. أصلا حنا مابقيناش كانتجرحو، ولكن رغم دلك مانقدروش ننفيو انه كانت عداوات لداخل، كنّا 29 بنت، زائد هاديك لي حاملة، جميع الأصناف والأنواع، ولي عليها الإقبال كاتكون محط حقد الجميع، حيث هي لي كاتكون المفضلة عند حادة القوادة. حادة مافقلبهاش الرحمة، منين كاتشوف شي وحدة فالبنات مابقات صالحة لوالو ومابقاش كايبغيها الكليان كاتجري عليها، فلوس الكار هوما اللخرين ماكاتعطيهمش ليها. داكشي لاش كانو البنات ديما موجدين راسهم وكاتلقى كل وحدة جامعة شي حاجة بالتخبية، كاتحيدها من عند الكليان فالبيت بالتخبية قبل مايدوز عند حادة لانه لا ثقة فالزمان ولا ثقة في حادة، وغالبا كاتكون ربعمية مكمشة كاديرها فالسوتيامات باش مايبانش ليها الأثر، ولا اقل ولا اكثر داكشي على حسب الأداء ديال البنت وعلى حسب الكرم ديال الكليان.

بالنسبة للأنواع د البنات لي كانو كايفضلو الرجال، ماكاينش نوع مفضل بالخصوص ولكن الرجال الكبار كانو كايبغيو البنات صغار قدي أنا  قد حنان، تكون مزال فتية، وكانو الشباب الصغار كايفضلو الميمّات باش يوريهم شنو يديرو وينفعهم بالتجربة لان غالب الشباب الصغار لي كانو كايجيو عندنا كانو كايعيشو التجربة لأول مرة وكايكونو مخلوعين ماعارفين والو. وخاصهم ميمة فايتة 34 باش تقدرتعوض داك الجهل و الخلعة لي شادينو مسكين. بصح مسكين حيث اول مرة  شاب صغير مزال مادار عشرين عام غادي يعرف شناهو الجنس كايعرفو فدار ديال  لقحاب وهادشي مؤلم صراحة.

فالبورديل كنّا كانتحاشاو نشوفو فبعضياتنا فالعينين، كلشي كايهضر مع كلشي ولكن تاوحدة ماكاتشوف للأخرى فعينيها، غير هاكاك وصافي بدون سبب. واقيلا ماكناش كانقدرو نشوفو حيث كانخافو نشوفو القهرة فعين بعضياتنا ونرجعو اللور. قليل فين كانو البنات كايدابزو حيث حادة حاضية وواقفة على شغلها. كلشي الا الصداع، حيث الرجال كايهربو من عيالاتهم بسبب النگير والصداع وكايجيو عندنا باش يفوجو على روحهم، وحنا كان خاصنا نوجدو ليهم الظروف المناسبة بعيدا على الصداع والخصام. لهذا كانت حادة كاتسامح فكلشي الا زوج بنات تناتفو ونوضوا الفوضى، كاتجري عليهم بزوج بلا ماترحمهم ولا تسمع علاش أصلا تخاصمو. حيت هي أصلا الدنيا مارحماتهاش وماعطاتهاش الفرصة باش تتعلم ترحم.