نبيلة شرف-كود

—

عمري ماشفت بحال ديك الماكلة لي حطو لينا، حوالى مشويين ومزوقين بالخضرة، بسطيلة لي عمري شفتها فحياتي وغير كنت كانسمع بيها من عند البنات ملي كايبداو يهضرو على الطبخ، الحمام معمر ، قنية مشوية، الحوت و الكروڤيت حتى الكروڤيت كنت عمري ماشفتو حتى هو غير كانسمع عليه وعارفة انه غالي بزاف وشي حاجات اخرين ماكنتش عارفة شناهوما صراحة.

اول حاجة بديت ناكلها هي الكروڤيت حيث بان لي بنين، درت شوية فواحد الطبسيل وماعرفتش كيفاش نبدا ناكلو حتى جات بشرى واحد البنت جات معانا وقالت لي  انه كايتكال بلا قشرة ووراتني كيفاش نحيد ليه القشرة عاد ناكلو، صراحة عمري ذقت بحال ديك البنة، بقاو عينيا حاطين غير على الكروڤيت صافي ومن بعد دزت لداكشي لي كايشبه البوبوش ولكن كبير ولي عرفت من بعد انه سميتو  لي زويتر، كان حامض وفيه ريحة البحر وبنين واخا عمري شفت البحر ، ماكنتش متيقة راسي انني كاناكل داكشي، فدار حادة القوادة طبنا غير بالدجاج واللحم والقطنية عمرها ماجابت الحوت حيث كايخلي الريحة فالدار و الكليان ماكاتعجبهومش داك الريحة.

تما عرفت راسي انني ماعارفاش بزاف د الحاجات فالدنيا ابتداء من الماكلة وحنا طالعين.

ملي ساليت الكروڤيت دزت للبسطيلة حتى هي كانت بنينة بزاف. واحد اللحظة جاتني البكية حيث تفكرت مّي الحنينة لي ماتت صغيرة وعمرها كلات هادشي.

فالطبلة الاخرى كان الديسير والفروي بزاف بزاف، انا فالديسير كنت كانعرف غير التفاح والبنان والليمون والعنب صافي. اول مرة نشوف أناناس وحب الملوك والكيوي و المانچا وندوقهم كيدايرين.

كنت جالسة فواحد القنت بعيد شوية عليهم وبقيت كاناكل بوحدي وكانشوف فيهم كايكميو ويشربو وياكلو، كنت فرحانة بزاف واحد الفرحة عمري فرحتها من شحال هادي. ملي كاتاكل ماكلة نقية وفشكل كاتحس براسك تبدلتي، مافهمتش كيفاش نشرح داك الاحساس ولكن حسيت بحال انني كنت مظلومة فحياتي بزاف وإنني نستاهل ناكل ديك الماكلة ديما بحال الا داكشي لي شفت وكليت  ردني انسانة اخرى.

داك النهار عرفت انه فالعالم كاين زوج انواع د الناس: الناس لي كايعرفو كاع انواع الماكلة لي كليت بالسمية والنوع لي كايعرف غير القطنية والدجاج ومرة مرة اللحم فالأعياد والمناسبات.