24/04/2024 12:00
قرار بتجميد حساب لبيكيه بسباب التحقيق فصفقة سعودية لاستضافة السوبر الإسباني
حكيمة لعروسي كود ////
كلشي الناس تايقولو ليلة راس العام تايكونو السكايرية بزاف ، و تايكونو الحوادث والضرب والجرح والمضاربات …. ولكن ماشي بنفس النسبة في رمضان !! غادي نقولو راه هاديك غير ليلة أما رمضان راه شهر مايمكنش نقارنو ولكن راه السكرة تقريبا 10 اشهر في السنة إيلا حيدنا الربعينية ، وطبعا ماشي جميع الناس تايسكروا وماشي كلهم تايصومو تاتبقى حرية خاصة …
ماعليناش نبداو بالسكايري تايدخل يشرب الكاس الأول تايبقى عادي ، يشرب الثاني تايبدا يبان ليه كلشي زاهي ، تايشرب الكاس الثالث تايبدا يشطح ، الكاس الرابع تاتجيه على الغنا ، والكاس الخامس تايبدا يتاصل بالحباب منهم الحب الأول اللي عليه نعول، الكاس السادس تايبدا يهضر بلغة غير مفهومة وتايبدا يخربق و ديك الساعة إيلا زاد تانسمعو طاطوطا طاطوطا زعما الإسعاف …
نجيو للصايم تايفيق مع الصباح ماقادرش يشرب قهوة باش يتحلو ليه العينين و خصوصا أنه بات سهران تالوقت السحور ، تاينزل ناعس للزنقة ناسي وراقيه ناسي شغلو و يمكن ناسي حتى تقاشرو و لابس الصباط بلا تقاشر …. تايشوف في جميع الناس داك الشوفة ديال الله يقربلها بعدو مني راني صايم !! واش غير بوحدك اللي صايم ؟؟ يدخل للخدمة معطل مالو ؟؟ راه صايم ! مايديرش خدمتو مزيان أو يغلط في الحساب أو في اي حاجة أيا كان عمله ، مالو ؟؟ راه صايم … في الصراحة تالسكايري ملي تايغلط في شي لعبة ولا يطيح على شي كرسي ولا طبلة الناس تايقولو راه سكران ماتديش عليه ….
تاتوصل الربعة ديال العشية تايولي بنادم كلو مقطوع ماشي غير من الكارو أو القهوة لاااا مقطوع من الماكلة ومن الما … التحرش ماتيتقطعوش منو هاداك مامعاه لعب تايبقاو يشوفوا في البنات ويقولوا مابغاو ويتبعوها باللهم إني صائم وخا تكون البنت لابسة جلابة أو خيمة ماشي مشكل لأن التحرش طبع يصعب معه التطبع على حسن الأخلاق في الموسم الرمضاني …
إيوا مع الخمسة تقريبا التوقيت المحلي ديال المضاربات وعلى القاطنين خارج المغرب مراعاة فروق التوقيت …. المضاربات على الحليب و على الشباكية وأنا جيت قبل منك و هاد التمر مالو مسوس والخضارا تايتشايرو بالكيلوات و مالين الحوت مناكرين على الكليان …. وزيد وزيد …
تايقرب وقت الفطور اراك لحوادث السير كلشي مقلوب جري عليا نجري عليك بنادم خاصو يوصل قبل ما يؤذن المغرب ماكاين غير حرك الضو والإشارات …
ولكن السطاج لخر هاد العام جانا من مدينة بني ملال الناس ضاربو في الجامع في أول يوم رمضان على طريقة تفراق التمر والحليب وهزو واحد رئيس جمعية للسبيطار و تجمهر الناس و الحيحة نايضة في جامع …
وأيضا في أول رمضان جوج شباب في عمر الزهور ماتعداوش 20 عام واحد قتل الآخر في مقبرة الرحمة على مية درهم …
فيناهيا حرمة الميت و حرمة المقبرة و حرمة الجامع و فين هيا حرمة هاد الشهر …
والجميل أن الناس ماتايشوفوش هاد التصرفات كاملة تايشوفو غير شي بنت إيلا لابسة صاية و يلعنوها و مايلعنوش راسهم على هاد الأخلاق السيئة وهاد المعاملات و تايشوفو غير شي حد إيلا فطر يتكاراو عليه بالحجر …. لهذا مازال راجعة ليكم في مقال على إفطار رمضان وعلى دوك الخماسيين اللي تايفطرو مساكن إيلا شافو صورة بنت في الفايسبوك لأن قلبهم دعيييييف ( كلمة ضعيف كتبتها بالدال مقصودة باش تقراها كيفما كتبتها )
رسائلي للكبار فهما لا الكبار سنا .
الله يجيب اللي يفهمنا و لا يعطيناش .
