محمد سقراط كود /////
هاد اليوماين انتشار واحد الفيديو كيبان فيه طقس الذبيحة فالوالي مولاي براهيم ، هاد الطقس لي عندو تاريخ وباقين محافظين عليه شرفاء الزاوية وسكان المنطقة وهو طقس احتفالي كيدار بطقوس معينة ، فمثلا ذبح الجمل مكيتمش مباشرة وانما كيتغرس ليه جنوية فصدرو ومن بعد كيطلقوه يجري مع الحدورة وكيتبعوه حتى يطيح ويذبحوه ، وكل موسم وعندو طقس خاص بيه للذبيحة ديالو ، وفالعالم منتاشرين مثل هاد الطقوس ومحترمة فعدة دول ، وكاين دساتير ديال بلدان كتحمي مثل هاد الطقوس منها الدستور الأمريكي ، مادامت الطقوس مافيهاش عنف اتجاه الأطفال أو الحاجات لي كيعاقب عليها القانون.
موسم مولاي براهيم وكأغعلب المواسم فالمغرب فراه بالضرورة عندو بعد ديني وفنفس الوقت بعد ترفيهي ، واحد المناسبة إحتفالية فين كيتمعوا الناس وكيتشافوا لحباب وكيتلاقاو البنات بالدراري ، وها لي كيفرح لقريد هالي كتدبر على راجل ، ها لي كيدوز الليلة فالحضرة تقربا الى الباري عز وجل ، ها لي بايت ناشط ، المهم كولشي كيفوج وكل واحد بطريقتو وتاواحد ممتدخل فلاخر ، وهذا هو المغرب الحقيقي الأصلي لي توسخ بالفكر والدين والعقائد المشرقية القاتلة للروح والمحاربة للحياة ، وهذا هو مغرب التعدد والثقافات والحريات لي كان شحال هادي ومابقاش .
الموشكيل هو فإنتشار فيديو كيصور هاد الطقس ديال الذبيحة ولي بان للعديد بأنه طقس همجي متخلف كيبين حياونانية المغاربة وتخلفهم ، وللأسف هاد الرأي تلاقاو فيه الخوانجية مع السلفيين مع الحداثيين مع فاتي فلورات أإلبهم هذا هو رأيهم لي كان بعد رؤية الفيديو ، الموشكيل هو أن السلفي والخوانجي ماعاجبوش داكشي حيث كيعتابرو شرك بالله وخاصوا يتحارب من أجل احلال عقيدة التوحيد لي هي فعوض تذبح جمل فمولاي براهيم كتولي شاد الطيارة بالملاين باش تذبح خروف فمكة وتبوس الحجر الأسود ، يعني نفس الطقس وأسوء كاع ، ولكن السلفي أو لخوانجي عندو معاه مشكل الى تدار برا السعودية وصافي أما الى تدار فيها فراه هاداك هو الإسلام ، بحال هادو كنتفهموا علاش باغين يحاربوا مثل داك الطقس ، فاتي فلورات كالعادة دايرات فيها مرهفات المحاسيس واخا كيتصوروا مع راس الحولي فالعيد لكبير ، وفاللخر كيبقاوليك الحداثيين لي دايرين فيها فاهمين ومتقدمين وانسانيين كثر من لقياس ، ولي باغين تاهوما يحاربوا هاد الطقس بدون تقديم بديل طبعا ، ديك اللعبة ديال ماتبقاوش تديرو الموسم فمولاي براهيم والى بغيتوا تحتافلوا نتلاقاو فالويكاند نشربوا بيرة فالمعاريف، طبعا هنا كيبان غباء اجتماعي مهول ، حيث فالواقع على أي مغربي عاقل يحمي مثل تلك الطقوس ويدافع عليها لأنها كتبقى هي أقوى سد منيع بينا وبين التطرف ، حيث الطبيعة لا تقبل الفراغ ، راه بنادم إما غادي يمارس داك الطقس هنا إما غادي يتخلى عليه فمقابل يولي متشدد أصولي ، حيث كيبقى خطاب التشدد فهاد الحالة مقنع وأكثر منطقية ، راه كاين فرق بين يجي واحد لحية من التقاة ويقوليهم هاداكشي لي كتديرو راه شرك بالله ويغرقهم أحاديث وبين واحد يقوليهم داكشي لي كاتديرو راه متخلف همجي خاصكم ماتبقاوش تديروه وكفى ، طبعا خطا التشدد والأصولية عندو قاعدة وشرعية دهنية وقابل للتلقي فذهن المغربي من خطاب الحداثة المخصي .
ويظهر في الفيديو أيضا شرطي كيدفع الناس حرسا على سلامتهم وكينظم الطقس باش ميتآذى تاحد ، وحيث كيظهر هاد البوليسي بقاو نشطاء الفايس وحداثيي شعل وكمي معايا وأنا عقل ماشي غير جسد ، وبداو كينددو وينتاقدوا بأن بحال هاد الطقس المتخلف كيتدار بحماية الأمن المغربي ، بينما فالواقع خاص تفرح ملي تشوف المخزن كيدعم فالزوايا وكينظم ويحمي مثل هاد المواسم ، فراه بهاد الفعل كيحافظ على هوية المغاربة من التحريف لي طالها طيلة عقود حتى أصبح العديد منهم عبارة عن مسوخ بدون هوية ولا جذور ، ومن هاد المنبر تحية للأمن الوطني لي كيسهر على أمن مثل هاد المواسم ، وحبذا لو خرجات ليهم ميزانية كبيرة وتشجعوا المغاربة يمشيو ليهم عوض الذهاب يديرو هاش الشي برا ويخسروا موكة عند البراني ، هي كترجع للمغرب بطرق أخرى ولكن من الأحسن تخسر هنا من اللول
