محمد سقراط كود ////
الحاجة لي كتخلي برنامج قفص الإتهام أنجح برنامج حواري فالمغرب علما أنه برنامج كيدوز فالراديو وكيتحط فاليوتوب ولكنه متفوق على أي برنامج حواري آخر فالمغرب بسبب غياب التمييز تحت أي شكل من الأشكال بالنسبة للظروف ديالو ، فكما ممكن تلقى رئيس الحكومة وكاع قادة الأحزاب السياسية فالمغرب وأغلب الوزراء يمكن تلقاني أنا أو الستاتي أو الصنهاجي أو أي واحد آخر ، وحقا برنامج لي يمكن يدوز فيه أي مغربي يعبر على راسو، وهذا سر القوة ديالو.
وبالأمس استقبل الكوبل المثير للجدل والسخرية والقرف والحسد والكره والحب وعدة مواقف ومشاعر متناقضة أخرى، سارة كريويل وعبد الله كريويل الملقب بأبوجاد وحرمه ، هاد الإستظافة لي خلات بزاف ديال الناس يعبرو على السخط ديالهم والرفض ديالهم ليها فصفحة رضوان الرمضاني الساخرة، وكالعادة بداو كيتاهموا رضوان بأنه طيح النيفو وخلا شحال من واحد وجاب هاداك راس لافوكا ومرتو ، الى غيره من الألفاظ القدحية في حق أبو جاد ومرتو ، باغين يولي البرنامج الوحيد فالمغرب لي يمكن يدوز فيه أي واحد وممتع ومفيد وحقا كيعرفنا بالناس كأي برنامج حواري ميت من دياول القنوات التلفزية المغربية، وفاللخر يقوليك التلفازة فيها الحموضة ، وهي الحموضة عندهم فعقلهم وباغين يعمموها حتى على البرامج الأخرى لي مافيهاش.
نسبة السخرية والكره والحقد والحسد كانت طاغية على أغلب التعليقات لدرجة أي واحد غادي يتسائل آشناهو الجرم لي دارو أبو جاد حرمه ، آش دارو لهاد الناس واش ارغموهم أنهم يديرو لايك للصفحات الشخصية ديالهم ، واش بغاوهم يتبعوهم صحة واش خداو ليهم شي حاجة واش غتاصبوهم لا قدر الله ( يمكن يديروها بجوج)، وفاللخر وككل مرة فين متشوف جيوش الكارهين المنتقدين موجهة الأسهم ديالها لشي حد عرفوا ناجح أو على الأقل فايتهم فشي حاجة ، حيث راه فالعادي هو أنك الى مكيعجبوكش تفوتهم ، ماشي تظل النهار كلو مقابلهم تسب فيهم حيث ماشي بحالك ، راه خاص ندافعوا على الحرية فالإختلاف ماشي ندافعوا على التنميط وللأسف المغاربة الفايسبوكيين سواء بشقهم الحداثي أو الرجعي هم أغلبهم دعاة للتنميط وللصورة الواحدة ، بالنسبة للحداثيين الى مكنتيش بحالهم فراك مكلخ متخلف والعكس بالنسبة للخريين ، وهادشي لي كيبين للأسف أن الكائن المغربي متشابه ومكاينش اختلاف كبير بين بعضياتوا واخا يتبنى أي إيديولوجية كيما كانت.
أنا مكيعجبنيش أبو جاد ومرتو مكنتافق معاه فحتى شي حاجة وهادشي ماشي ضروري وكيبقى رأيي الشخصي ومازايدو مناقصو هو بوالو ، ولكن ملي كنشوفوا مصور بمارسيديس كلاص قرطة كنقول فنفسي فوقاش تولي عندي بحالها ، عايش ولد لحرام ، ملي كنشوف تصويرة ديال كوزينتو كنقول واه سعداتو ولد الحرام داير موكة غي بالغميق ، وهادشي لي كيقولوا بزاف خريين فالداخل ديالهم ، حيث بغينا ولا كرهنا أبو جاد وحسب الصورة لي كيسوق لينا إنسان ناجح فحياتو وباه لاباس عليه وعلفو مصير ، وداكشي لي كيدير فالويب كيلقى راواج وكيلقى داعمين كيمولوه وعايش منو ، وتصويرتو معلقة فالبانوات ديال أي مدينة فإشهارات لشركات كبيرة ، إذن السيد ناجح ، وبالنسبة ليا هذا هو السبب الحقيقي لداك الغل والكره والحقد لي كيبان فالتعليقات ، وكون كان شي واحد مقودة عليه وكيخور فطيز الميت كانوا غادي يشجعوه ويردو منو إيقونة كالعديد من بوحزوق فالويب المغربي ، حيث هادوك النوع ديال المنتقدين مكتحركهمش غيرة على جودة الإبداع أو المنتوج وانما غيرة على نمط عيش أبو جاد ومرتو ، وشحال من واحد مكرهش يكون بلاصتو ولكن الغالب الله ، الأرزاق حظوظ .
