كود احمد الطيب /////

المتفائلين بحالنا كنا نعتقدو ان استيلاء الاتحاد الاشتراكي بدون وجه ديموقراطي على رئاسة مجلس النواب غادي يعجل بتشكيل الحكومة. الحكومة ديال بنكيران ما تشكلاتش وبان العربون قبل الانتخابات ومع ذلك كان اللي كيعتقد ان هناك ناس بعقلهم فالدولة. يقدمو مصالح الوطن على حبهم او كرههم للاسلاميين.

دابا يكفي لاي مسؤول يتجول فالبلاد يسمع للمواطنين كيرددوا ما خلاوش بنكيران يدير الحكومة. قليل بزاف بزاف اللي كيقول بللي ما قدرش. كلشي مآمن بوجود جهة فالدولة ضد يدير حكومة. هاد الشي كيمس المغرب. كيهددو. المغرب محصن وقوي ايلى كان قوي داخليا. ديموقراطي. تجربة بنكيران الى تجهضات ثمنها غالي بزاف. تاريخنا القريب كيبين لينا ثمن تهور التزوير. تاريخ فيه الدم ماشي الرصاص. فزمن غير الزمن الحالي.

الخطير فيما يحدث هو كلشي الاحزاب تقريبا والجمعيات متأثرة فيهم جهة فالدولة. كتحتقر المواطن وصوتو. ارادة الناخب ماشي مهمة اللي مهم هو ارادة طرف فالدولة بنى حياتو على مواجهة الاسلاميين بلا ما يجيب نموذج صحيح. جمع الانتهازيين الفاشلين اللي كيهمهم مصالحهم قبل مصالح الوطن والنتيجة تقوية الاسلاميين اكثر.

دابا اللعبة واضحة. بنكيران ما باغينوش يدير حكومة. واخا تعاود الانتخابات ويبقى ليه غير صوت واحد ما يديرش هاد الحكومة.
الديموقراطي اللي كيمثل امل هاد المغرب فاحترام الارادة الشعبية هو الملك. يستحيل يسمح لفترة حكومو برمي هاد الارادة الشعبية فطارو الزبل ويتم تعيين حكومة من وحدين رفضهم الشعب. الملك لاعب دوليا فافريقيا واوربا واسيا. قوتو فهاد النموذج اللي كيسوقو لهاد الدول. ديموقراطية غادية دقة دقة ولكن غادية. القطع مع هاد الدينامية مس لهاد السمعة. غادي يدك كلشي هاد الشي اللي تحرث هادي 17 العام. المغرب غادي للاتحاد الافريقي وهو قوي. يستحيل الملك يقبل بالتراجع عن هذه التجربة الديموقراطية.

من غيرو لخرين هامهم مصالحهم الخاصة. هامهم ينتاقمو من بنكيران وصافي.