عبد اللطيف اكنوش استاذ باحث ////
حديث الهدهد الأبكم في قضية ولد الدرهم !!!
الهدهد ديالي مشا حووم شي شويا، وهو يرجع ليا بهاذ الهم…نطق وكًال ليا:
– آجي بعدا يا محلول الفم…عممرك شفتي شي بوليسي ارتاكب شي خطأ وظيفي في العمل ديالو في كسيدة ولا غير كسيدة، وتدخخلات النيابة العامة، وعطات الأمر بوضعو تحت تدبير الحراسة النظرية؟ !!
– لا آعمي الهدهد… ماعممرني شفتها، لا هنا، ولا في فرنسا ولا في المريخ، واخا يعززمو عليها بماء زمزم…
– واشنو ظهر ليك دابا، تدوي ولا نهرسس لممك الفم؟
– بان ليا بللي هاذ الكسيدة ديال ولد الدرهم، عندها شي ارتباط بشي حاجة ماشي حتى لتم…ذاك الأخ ديال المغني الأمازيغي للي المداويخ دالفايس كًالو مات في الكسيدة، غير كذبة أبريل معططلة…لأن كسيدة ولد الدرهم مامات فيها حد…الكسيدة للي مات فيها الأخ ديال المغني كسيدة اخرى، مولاها تشدد قبل تاريخ فضيحة ولد الدرهم، وتعرض على القضاء، والضضروبة ضربت والفحل دداه مولاه…
– وهي آش؟ القضية ديال ولد الدرهم آحنيني، فيها قضية أخرى عندها طابع جنائي آآآآخر، مانكًولش ليك عليه دابا، حينت “لونكيت” باقيا خددامة…وهذاك الشي علاش النيابة العامة تدخخلات بصبباطها، وحططات البواليس تحت تدبير الحراسة النظرية لإتمام مسطرة البحث ديال المعقول، وهذاك الشي علاش لابد مايتصننتو للددرري ويبقششوه مزيان…أما الكسيدة وحالة السكر ديال الفيديو وذاك الشي، غير كولو…
– سير آعمي الهدهد، لهلا يحركً ليك شي جناح، ونبقى موضضر ! هاني غادي نتسنى نتائج البحث، قبل مايوللي وجهي مخسسر…إيلى كان شي جديد في القضية، عييشك إيلى ما تجيني بالخفف…وبييَع ليا باش مانبقاش غير كانخررف…
