سهام البارودي كود /////

لا لا هاد السيد بزاف ! خمسطاش اليوم ديال الحملة و كل نهار زلة جديدة ….

منصف بالخياط منوض قربالة عاوتاني فالتويتر بسباب واحد التصويرة نشرها ديال مرا ارملة ساكنة فعشة وسط المدينة فكازا ! خونا منصف واقيلة ماعمرو شاف هادشي لي كايشوفوه المغاربة كولا نهار، ماعمرو داز الصباح بكري من الزناقي ديال كازا لي عامرين بالشمكارة عيالات و رجال ناعسين فوق الضس و لا مفرشين الكارطون فباب العمارات ! هادشي لي خلا الردود على الصورة تكون فالغالب قاصحة :واحد السيد جاوب منصف بالخياط قاليه راه تبارك الله لاباس عليك لا بقات فيك ديها سكنها !

الصورة ماشي غريبة ! و هاد المشهد راه المواطن المغربي موالف بيه ، و ديك المرا راه منها بزاف، ماكايبانوش غير فالحملة الانتخابية، ماعرفتش علاش زعما ديك التصويرة ؟ شنو الهدف ؟ شوفوني راني حنين ؟ شوفوني بقات فيا ؟

شنو كاتسناو من الناس فاش كاتبارطاجيو دوك التصاور من غير انهم يحقدو عليكم! راه التصرف ديال منصف بالخياط لي بغا زعما يبان بيه انه حنين و كايبقاو فيه الناس كايتؤول على انه رغبة في الظهور و التمسكين و الترهبين لي عاقو بيه المغاربة ! صافي دوك المشاهد راه ولفناهم مئات الاسر مشردة فالبلاد ! مئات الناس كاينعسو على الضس و فوق الكارطون و فبيبان الحوانت و العمارات و فالمقابر ! لا عندكم شي حاجة تقدموها لهاد البلاد و لهاد الناس قدموها ! لا قادين ديرو شي حاجة من غير البكا و النحيط د الهجالات ديروها ! دوك دموع التماسيح و شوفوني كانتصور كاناكل الزعبول و صوروني كانعطي دانون لبرهوش مالابسش الكرصون باش نبان ظريف ! و صوروني حدا مرا هجالة ساكنة فعشة باش نبان كايبقاو فيا الدراوش و هاز ليهم الهم ! راه افلام قديمة … عاقو بيها المغاربة.
شوفو غيرو …