سهام بارودي كود ////
سميتي س. المتعوسي ، السن 32 سنة، مواطنة ساكنة ففاس و كانقلب على واحد السيد سميتو حميد الشباط ! لا لا ماشي خطيبي ! لا ا سيدي ماشي راجلي ! شنو ؟ لا ماشي داكشي ! حميد الشباط مرشح ديال حزب الاستقلال.
نهار شفتو حل كونط فالتويتر، استبشرت خيرا و قلت و اخيرا غانقدر نتواصل مع هاد السيد لي خالق بلبلة!! نسولوه و يجاوبنا و نعرفوه و يعرفنا و يحس بينا و نحسو بيه … فاطار الانتخابات و داكشي ! ساعة السيد من نهار حتافل معانا بعيد المرأة ف 8 مارس كلينا شربنا ضحكنا ؛ من تما بات ما صبح، ولكن بقا عندنا امل انو يرجع خصوصا مع الحملة الانتخابية من تما و هو غابر والو ، ماعاودنا سمعنا عليه خبار..
شنو ؟ علاش غبر ؟
ماعرفتش ! حق الله ماعرفت علاش غبر ! شافوه شي ناس حدا المحطة د الكيران د فايسبوك كايتسارا تما مع واحد السيدة شهبة و لابسة جلابة حمرا و لكن مشينا قلبنا عليه مابانش ليه لاتر! واش خلعو تويتر واش شاف داك التشرميل لي كايتشرمل منصف بالخياط و تسوخر لور حيت ماقاد على صداع ؟ لاوعلم ! مانقدرش نقوليكم !
كيفاش؟ علاش بغيتو ؟
وا الصراحة انا مابغيتوش على زينو! انا غي بان ليا دار كونط و قالك غادي يتواصل معانا و يفسر لينا و يدوي معانا حيت حنا راك عارف ! 2015 هادي وانا خدامة ماعنديش الوقت باش نحضر لدوك التجمعات الخطابية ديال الاحزاب! مرا مرا كانطل على التويتر ديالو حيت هو الشاف ديال حزب الميزان ! كانقول زعما مع هو الشاف راه غيبان و يحاشيها لينا يعطينا شوية من وقتو و يتناقش معانا كيما بزاف د المرشحين !
آخر كلمة نبغي نقولها ليه ؟
واا حميد وااا خويا ! وا غي رجع و الله ماتخاف ! راه التويتر ماكايعضش ! و تا بنادم لي فيه حسن من فايسبوك باين قاري و واعي و الاسئلة ديالهم حنينة ! غي فايسبوك لي فيه الهايش مايش لي كايلوح كومونطير فيه تخسار الهضرة و شي مرات شي ايحاءات جنسية الله يستر ” وا الشفارة مامصوتينش كلكم فحال فحال عقنا بيكم ” رجع راك قاد دافع على راسك! لي دوى معاك عطي لمو كوش دروات كوش فحال داكشي ديال البرلمان ماتخافش ناس تويتر و الله ماتسمع من فمهم العيب ! تاكل و تشرب تايبانو واليديك ناس التويتر حنان و كايهضرو بالفغونسي و فحالا جالبين ليهم على الجعرة ! دمهم بارد !!رجع ا حميد راه بنكيران ماكاينش !
وا حميد ! وااا خويا ! رجع ا خويا راه داك الفرخ الزرق ديال التويتر مريض بلا بيك ! بكا بكا بكا تاعماوه ليه عينيه و دابا راه طايح فالفراش !
وااا حميد… وا خويا … رجع راه التويتر خاوي ، الحملة مادازتش لينا بلا بيك راه غي بالخياط لي كايتبورد علينا تما…
رجع ا خويا راه توحشناك… و محتاجين ليك.
عافاك اخويا، نقدر نهدي ليه اغنية “وا داك الغافل بالي بينا، خاف علينا وا داك الغافل « ؟
شكرا ا خويا
“لي عرفو و لا شافو يتاصل بكوود و لا بالدوزيام”
