ريال مدريد.. بدا المشوار الكروي ديالو هاد الموسم، بفوز مهم وصعب على فريق نقدرو نقولوا أنه كان عنيد بالرغم من تلقيه هدفين….
النقط المهمة اللي نقدرو نلخصوا بيها هاد الماتش، الأساسية ديال الظهير الأيمن كارفاخال لا نقاش فيها، لاعب كايمتاز بالمرونة الدفاعية وحتى الهجومية وقدر أنه يعطي إضافة وتنشيط للجهة اليمنى، هكذا قدر أنه يحل مساحات للويزيلي غاريث بيل ويعطي فرصة للتحرك بسهولة قدّام الدفاع ديال قرطبة.
النقطة الثانية وهي التمريرات بين كاسياس وأربيلوا، العميد كاسيّاس كان كايتعمد ديما أنه يسدّد الكرة للجهة اليسرى عند مارسيلو، الشيء اللي كايدل على أن المشاكل بين كاسيّاس وأربيلوا مازال ماتحلاّت..
بن زيما رجع من بعد 14 ماتش وسجّل هدف وكان ليه الفضل بالعديد من المحاولات، الشيء اللي غادي يعطي اللاعب دفعة معنوية للماتشات الجّاية، وخّا أظن أنها مغامرة أنك تعتامد على لاعب إرتدادي فالأداء مثل بنزيما كمهاجم وحيد فتشكيلة الفريق.
النقطة الرّابعة هي مودريتش، وكروس، مازال خاصهوم الوقت مع الفرقة، خصوصا على مستوى صناعة اللعب، وكايظهر لي أن لحد الآن، مودريتش وكروس Don’t mix لكن فكل الأحوال هادي مازال غير البداية مازال مازال.
أنشوليتي معّلّم، فالشوط الثاني لعب برونالدو رأس حربة، باش يتفادى شي إصابة عضلية، بل كان كان جوكير فالكرات العالية خصوصا وأن وسط الميدان ديال الريّال كان مايت.
المشكلة ديال الريال يمكن نلخصها فمشاكل ذهنية، الفرقة باقي خاصها الإنسجام والثقة، وكانظن أن العديد من التغييرات في التكتيك غادي يعطي الأكْل ديالو، واللي ما فيه شك، أن المستوى ديال اللاعبى غادي يتحسن مع تعاقب المباريات.