سهام إباروري-كود

—
قالوها سيادنا اللوالا ” امول الكوتشي جمع كلشي بضاض يرشي “! هاد ليامات كتر اللغيط عاوتاني ! قالك ا سيدي جوج د الوزراء فالحكومة كايتحابو ! و طبعا مع المغاربة كايموتو على الضواسا و الاشاعات راه بنادم كايقلب على هاد السكوبات بالريق الناشف ! كلشي باغي يعرف شكون و كيفاش و كدا … كاين لي جبد لا ليست د الوزراء و بدا كايقمر فحال لا كايعمر شي وريقة د التيرسي غير هو فبلاصة العودان كايقمر بالوزراء!

 

 

والامر عادي حيت صعيب على بنادم يتخايل الحب د الوزراء كي داير ؟ غايكون فشكل عاوتاني ! ماشي فحال الحب ديال الهايش مايش صحاب حبك شطاني فرفر ! لا لا لا بالنسبة للوزراء القضية صعيبة عندهم بزاف حيت محضيين وبنادم عساس على فحال هاد الخبيرات، و يمكن كايبقا الحب هو العلاقة الوحيدة لي يمكن الوزير يحسد عليها الهايش مايش، حيت بنادم عادي راه ماداها فيه حد، بعرور تصاحب مع بعرورة كايسيفط ليها واتساب كاتسيفط ليه ففايسبوك ، يكومونطي ليها تكومونطي ليه ، يخرجو يتعابزو نهار الاحد حدا جامع الحسن الثاني ! يطاكيها مع الصخر ! نهار تصعرو و يتخاصمو كايهرس ليها لاكارط و التيليفون و هي كاتشبع فيه قميش تا كاتردو منكول ! بعرور يقدر يضرب صاحبتو و هانيا ! صاحبتو تقدر تعايرو وهانيا ! العلاقة ديالهم كايعيشوها صحة و بيخير و على خير تاواحد مامسوق ليهم لا صحافة لا موظفين لا احزاب لا معارضة! الجهاز الوحيد فالدولة لي خدام معاهم هو السطافيط د البوليس مرا مرا كاتجمعهم من ورا السور ديال شي مدرسة و لا شي دريبة مظلمة…

 

 

ماشي فحال الوزراء مساكن تابعينهم الحياحة و الصيادة دايرين ليهم داكشي ديال الموسم الصيادة د الحلوف! كايجيوه الحياحة من جهة و الصيادة من جهة ! و كايبقاو عليه وا شد شد شد …. حتى كايجيبوه حبل و بونت و هادشي لي كايوقع للكوبل الوزاري كايقمعو فيهم الحياحة ! و هوما اصلا تلقاهم خايفين من جنابهم و مخبيين من الصحافة و من الموظفين فالوزارة و من البركاكة … ماعايشينش فراحتهم ديك العلاقة هادشي بالاضافة للضغط النفسي فهو كايحرم الاقتصاد الوطني من واحد المورد مهم! علاش؟ حيت الحب د الهايش مايش راه كايستافد منو الاقتصاد الوطني اكثر من الحب بين الوزراء !

 

 

الحب د الهايش مايش هوا باش محركين مالين الحرشة و الرايب و بوكاديوس كفتة و بانيني داند ، و السينيمات و القهاوي… هادشي كلو محركينو لي كوبل و كون ماكانوش كون مات الاقتصاد الوطني من شحال هادي و كون سدو السينيمات و القهاوي ! و كانتمناو من هاد المنبر حتا الكوبل ديال السيد الوزير و السيدة الوزيرة مايبقاش مكمش و يساهم حتى هوا بالدفع بعجلة الاقتصاد الى الامام خصوصا فالظرفية الحالية لي هوما ادرى بيها …

 

 
و مالها شنو فيها ؟ الحب ماشي عيب! حنا مباركين لي ولاو عندنا وزراء تاهوما كايحبو و يتحبو !فحال الشعب ! باش بغيتو الوزير يحس بالطبقات المسحوقة لاماكانش كايعيش نفس المغامرات و نفس التجارب ديالها! مالهم ماشي بنادم من لحم و دم ؟ ماعندهمش مشاعر و محاسيس … ! راه مزيانة ليهم و لينا تاحنا كشعب يخرجو و يعيشو العلاقة ديالهم فالعلن تاهوما توقفهم فرقة الصقور و تسول السيد الوزير شكون هاديك لي معاك؟اش كاتجيك؟

 

 

راه قمة الانصهار بين الشعب و الحكومة هو هادشي فعواض مابنادم يبقا يطالب الوزراء يتشعبطو فالطوبيسات باش يحسو بمعاناة المواطنين هاهوما غايتشعبطو فالحب و يعيشو تاهوما المعاناة د الشعب و حنا من هاد المنبر راه مانزيدوهم غير الله يجعل كلشي مبارك و مسعود.