كود اسماء غربي ////

إذا كانوا الناس والمتتبعين كايتساءلوا علاش السينما فالبلاد ضربها الله .. واقيلة كاين جزء كبير من الإجابة على هاد السؤال عند مدير المركز السينمائي المغربي صارم الحق الفاسي الفهري اللي ملي جابو مصطفى الخلفي وزير الاتصال السابق وهو مسافر وخاوي البيرو ديالو أو خاوي البلاد كلها.

وباش ما نتجناوش على صارم الحق الفاسي الفهري ونكونو حقانيين، أجي نشوفو واحد المثال بسيط ونكتاشفوا فين كاين صاحبنا بين أكتوبر 2016 ومارس 2017 ، يعني ستة أشهر فقط :

نبداو بمهرجان مالمو اللي قضى فيه أسبوع كامل من 30 شتنبر إلى 5 أكتوبر 2016، ومن تماك مشى لمهرجان في الارجنتين واجلس عشرة ايام.

وامشا لمهرجان مراكش الدولي للفيلم اجلس فيه عشرة ايام أخرى ما بين 2 و10 دجنبر 2016. هز صاكو عاوتاني ومشا إلى العيون من 19 إلى 22 دجنبر 2016 في إطار الدورة الثانية لمهرجان الفيلم الوثائقي حول الثقافة والتاريخ والمجال الصحراوي الحساني.

وامشى مباشرة إلى إيطاليا لمدة أسبوع لشي مهرجان تماك.
ومنها لأرض الكنانة مدة عشرة أيام لحضور أسبوع السينما المغربية بدار الأوبرا المصرية من فاتح فبراير إلى 7 فبراير 2017 . وامشى بعدها مباشرة لألمانيا ودابا راه في مهرجان برلين لمدة عشرة أيام من 9 إلى 19 فبراير 2017 .

وسيسافر الفاسي الفهري بعدها إلى لوس انجلس لمدة عشرة أيام لحضور حفل الأوسكار يوم 26 فبراير 2017.

تم يعود للمغرب ويسافر إلى طنجة لحضور المهرجان الوطني للفيلم بطنجة بين 3 و11 مارس 2017 .
وغير يسالي غادي يشد الطريق إلى مهرجان الأقصر للسينما الإفريقية من 16 إلى 22 مارس 2017 ومنها نيشان لتطوان لحضور مهرجان سينما البحر الابيض المتوسط مابين 25 مارس وفاتح أبريل 2017 ، والبقية تأتي حيت هادشي غير اللي اعرفنا احنا اعلم الله شنو كاين آخر.

ماذا يعني كل هذا؟ هادشي كايعني أن الفاسي الفهري يتغيب عن مكتبه الوثير في الرباط على الأقل 100 يوم في ظرف ستة أشهر.
ويعني أن لا أحد يسير المركز السينمائي أو السينما فالبلاد أي كلشي كايخربق لأنه ما كاينش استراتيجية ولا ربان في السفينة.. لا قرارات ولا تنسيق.. الخواء المبين.

هادشي عندو أيضا كلفة مالية :
مائة يوم فقط من تعويضات السفر تساوي حوالي 25 مليون سنتيم، زيد عليها تذاكر السفر في الطائرة بيزنس كلاس إلى الوجهات البعيدة.
خص المدير يعرف وهادوك اللي جابوه يعرفوا بأنه لا يمكن ان نمارس السياحة على حساب دافعي الضرائب ومؤسسات الدولة. وكيفاش كايطلبوا من الناس بزيروا السمطة وعندهم هاد النموذج ديال المسؤول المكلف اللي تايسافر أكثر من وزير الخارجية ووزير السياحة مجموعين.