الرئيسية > آراء > المغرب زوين من السما فيه الفلاحة كايديرو باي باي للطيارة ! و لكن المشكل هوا فاش كاتهبط للأرض و كاتلمس عن قرب درجة القهرة و الزلط ديال هادوك لي كايديرو باي باي ‎
28/06/2017 10:00 آراء

المغرب زوين من السما فيه الفلاحة كايديرو باي باي للطيارة ! و لكن المشكل هوا فاش كاتهبط للأرض و كاتلمس عن قرب درجة القهرة و الزلط ديال هادوك لي كايديرو باي باي ‎

المغرب زوين من السما فيه الفلاحة كايديرو باي باي للطيارة ! و لكن المشكل هوا فاش كاتهبط للأرض و كاتلمس عن قرب درجة القهرة و الزلط ديال هادوك لي كايديرو باي باي ‎
 سهام البارودي-كود
واحد البرنامج داز فقناة فرونس 2 سميتو Le Maroc vu du ciel  ” المغرب لا شفتيه من السما” ! هاد البرنامج لي كلشي كايهضر عليه فالفايسبوك بينو فيه الصحافيين لي خدمو عليه بزاف ديال المدن و البوادي المغربية لي كاتعتابر من البلايص المهمين فالمغرب كيفاش كاتبان من السماء؟  ابتداءا من مولاي دريس زرهون ، وليلي ، و مرورا بأصيلة ، الدار البيضاء، مراكش …
شخصيا فاش شفت داك الروبورطاج ديال ساعة و عشرين دقيقة تقريبا بقا فيا المغرب و حسيت بيه فحال شي راجل كبير دوز يامات العز و الناشاط و دابا تلات بيه و ولا مريض و شاد الركنة. و لقيت راسي عوض مانفرح بداك الروبورطاج جاتني الغمة !
الروبورطاج بين أنه من الناحية الجمالية المغرب زوين ! وي زوين ! فيه جبال، بحور، غابات و صحرا ! من الفوق كثرة الألوان و الأشكال و اختلاف الجغرافية بين المناطق كاتعطي لهاد البلاد واحد الجمالية خاصة و لكن دوماج هاد الجمالية حدها السما و الطيارة ! غي كاتهبط للأرض كايختافي الجمال و الألوان و كاتولي وسط البشاعة ديال التخلف و الفقر و الجهل.

و شي مرات بلا ماتحتاج تهبط من ديك الطيارة !ريحة الفقر و الجوع كاضربك للقنوفة واخا تكون راكب فمركبة فضائية ! وانا كانتفرج فداك الروبورطاج ! فاش هضرو على القطاعات الحيوية فالمغرب الفلاحة و الصيد البحري انا بان ليا من الطيارة وجوه الفلاحة و الصيادة شاحتة ! القطاعات الحيوية لي كاتخدم عدد خيالي ديال اليد العاملة و لي المغرب كايعول عليهم باش يهز اقتصاد البلاد الناس لي خدامين فيهم مكرفصين ! كايبانو مكرفصين من الطيارة ! فقراء، جيعانين، مطحونين بالشمش و وسائل الانتاج البدائية !
فاش كنت كانقرا كان عندنا واحد الاستاذ كايقولينا كيفاش هاد الدولة لي كايحس بيها الفلاح براسو محگور، مكرفص ماعندو تا أهمية كاتسمي راسها دولة فلاحية ؟ في حين أي واحد عندو حانوت واخا فيه غي جوج ميترو و ماكايدخل ليه تا جوج دريال ديال الربح كايبومبي عليك صدرو و كايقولك ” أنا تاجر ” ” أنا كوميرسو” !
و فاش مشيت لفرانسا و وسولت واحد الدري صغير واحد النهار شنو بغيتي تكون فاش تكبر و جاوبني
Je veux être un agriculteur comme mon père, car c’est grâce à l’agriculteur que tout le monde peut manger.
“بغيت نكون فلاح فحال با حيت الفلاح هوا لي كايعطي للناس تاكل”
فهمت بلي كاين فرق كبير فكيفاش كايشوف الفلاح المغربي راسو و كيفاش كايشوفو المجتمع و كيفاش خاص يشوف راسو و يشوفو المجتمع.
طفل صغير فخور بالعمل ديال باه كفلاح ! حيت ماكايشوفش باه مكرفص و مطحون ! بالعكس كايشوف باه كايمارس واحد العمل مهم و عندو دور كبير فالحياة ديال الناس.
حنا الفلاح عندنا ماعندو اعتبار ، ديك الخدمة لي جات تحت من گاع الخدامي !الفلاح فاش كايوصل لكازا كاسولتيه فاش خدام” كايقولك غاااا فلاح” هوا ماراضيش براسو و ولادو ماراضينش بيه و ماباغينش يشبهو ليه و عوالين يكبرو و يمشيو للمدينة! الخدمة لي مولاها ماقرا مافهم ماعرف ! عروبي ! موسخ ! حوايجو مگطعين فيه ريحة الزريبة ! هادا هوا الفلاح فالمخيل المغربي ! و هادا هوا الفلاح لي صنعنا ! و كانقولو بوجهنا حمر بلي الفلاحة قطاع حيوي ! يشغل اكثر عدد من اليد العاملة و يساهم في كذا و كذا …
نفس القضية بالنسبة للصيد البحري ! قطاعات حيوية مهمة و لكن الناس لي خدامين فيهم محگورين و مكرفصين و غير مؤهلين و معرضين للاستغلال البشع من طرف ارباب العمل ! لي مرض فيهم حياتو مشات و ولادو غايتشردو ماعندهمش الحق يمرضو و يموتو ! البرنامج كايوري أرض خضراء من الطيارة و ليسير ديال ماطيشة و بالبانان و صنادق ديال السردين و الميرنا و الكروفيط و أنا كانشوف واقفين حداهم ناس مقهورين بالزلط ! كي دايرة هاد الثروة الفلاحية و السمكية لي دوك لي كايضربو فيها تامارا مامستافدينش منها حتى فحالتهم!؟

البرنامج ديال Le maroc vu du ciel ! الصراحة فيق عليا المواجع اكثر ما عجبني !
مايمكنش نقول واااو وينوووو المدينة القديمة ففاس شحال زوينة وانا عارفة بلي النص ديال الديور آيلين للسقوط و بلي الناس تما ساكنين فالبيوتة عائلات و دراري صغار كايفيقو وسط الليل كايلقاو باواتهم طالعين فوق ماواتهم في منظر بهيمي!
مايمكنش نشوف الألوان فالسطوحة ديال الدباغين ! و مانفكرش فدوك الرجال لي داخلين كايشتفو برجليهم و يديهم وسط المواد الكيماوية الخطيرة و لي خدامين عطش ! لا وراق ! لا سنيسيس ! لا روتريت ! والو ! غي الألوان و التصاور و الهضرة الغليضة على ” الصناعة التقليدية” و لي خدام فهاد الصناعة التقليدية نهار تدي ليه شي ماكينة د النجارة يديه يتشرد هوا و ولادو.
ماكانفرحش فاش كانشوف جامع الفنا وانا عارفة بلي فيه عيالات و رجال كايقودو دراري صغار للسياح باش يمارسو عليهم السادية ديالهم! و تقوليا نتا راه مكلاصياه اليونيسكو مع الثرات العالمي للإنسانية! إ ينا إنسانية ؟
فاش كاتشوف الدار البيضاء عامرة بالمرطوب ! السيما ! السيما ! السيما ! حتى شي لمسة معمارية ماكاينة ! حتى شي منطقة خضراء ! حتى جمالية ماكاتبان وسط داك البني ! الشراجم ديال السكن الاقتصادي قد القفوزا ! الديور كولا كايبني و يصبغ كي عجبو ! شي فوق شي ! ماكاينااااش شي حاجة سميتها سياسة معماااااارية ! لي تخليك تشوف الدار البيضاء و تقول واااااو هادي مدينة نيت ! حاضرة المستقبل ! العاصمة الاقتصادية…

وي المغرب زوين آ خويا بادو من الطيارة ! كلنا كانشوفوه زوين من الفوق و لكن المشكلة ماعندناش معاه من الفوق المشكلة كاينة فاش كاتهبط من ديك الطيارة للأرض! و كاتلقا راسك وسط واقع بشع !
المغرب ماشي كارط بوسطال باش نشوفها من الطيارة و نفرح حيت فيها الالوان و الفلكلور و الحيدوس و التبوريدا ! حنا ماشي قرودا يجيو يتفرجو فينا السياح  لي شبعانين حضارة و نقى و فيطامينات باش يشوفو كيفاش كانو كايعيشو الناس فالقرون الوسطى.
المغرب لي كايهمني هوا لي لتحت ! هوما هادوك لي كايديرو باي باي للطيارة شنو واكلين و شنو لابسين و كيفاش كايعيشو!؟
خلاها واحد المغني
“Vu du ciel l’enfer est comme le paradis”

موضوعات أخرى

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون

28/03/2024 03:00

السروال ديال مقدم برنامج بريطاني داير أزمة فكوريا الجنوبية.. ها شنو دارت القناة ديالهم- فيديو

28/03/2024 02:00

مصور عندو 71 عام اتاهم الوالد ديال تايلور سويفت أنه تعدا عليه بالضرب ملي كان كيصورها

28/03/2024 01:00

هجوم موسكو الارهابي.. 95 شخص ما زال مفقودين وروسيا كتشكك فان داعش هي اللي دارت هاد الهجوم