كود كازا ////
قرر عدد من المنخرطين ديال فريق الرجاء الرياضي، في اجتماع داروه اليوم الاثنين، اعقد جمع عام استثنائي في 6 شتنبر، الهدف ديالو هو انتخاب رئيس جديد، بلا ما احتاجو استناو الجمع العام لباغي اديرو حسبان في 19 شتنبر.
المنخرطون تافقوا اليوم باش افتحوا باب الترشيحات لرئاسة الرجاء، وخلافة حسبان، وغادي اعلموا الجامعة والعصبة الاحترافي، وكلشي المؤسسات المعنية، باش اكونو على علم أنهم غادي اجريو على حسبان في جمع عام استثنائي.
الخطوة لغادي اقدمو عليها المنخرطين، ولي عدد منهم شطب عليه حسبان من لائحة المنخرطين، غادي تخلي الرجاء اولي عندها مكتبين مسيرين ورئيسيين، وغادي تزيد الأزمة في الرجاء، بعدما كانت أزمة مالية غادي تولي أزمة تسيير ، والرجاء غادي اولي اسيروه جوج الرؤساء.
المعارضين ديال حسبان بغاو اديرو معاه حل وسط وتراجعو على الجمع العام الاستثنائي لكانوا باغين اديروه في 4 من هاد الشهر، وقالو لحسبان نتافقوا على 6 شتنبر، ولكن هو حلف ميستاجب ليهم، وهوما حالفين حتى اجريو عليه بأي طريقة.
