د-مراد علمي

—

واحد النهار ضرب خويا الصغير حتى خلا ّه كايعوم فى دمـّو أو قيحو، الدّات ديالو كولـّها دمـّالة وحدة. هرّس ليه جوج  ضلعات فى السدر أو بالعين ليمنية ستّ شهور أو هو كايشوف غير الضبابة. منع على امّي تدّيه لـَسـّبيطار، هدّدها بالضرب أو الجرح إلا ما تجاوْباتش مع هواه. “أو شنو غادي إقولوا الجـّيران؟” هادا هو اللي شاغلـّو البال، القيل أو القال أتـّر عليه مسكين كـْـتر من آلام خروف الضحية، قليلة القوة، لاعـْوين لا دْوى. كون ما كانتش جدّاتي اللي كاتــّقن فن تجبير الجرح بالطحين أو الفول اليابس، كون بقى مشوّه. من هاد النهار بغى يرجع خويا  محامي باش إدافع على راسو غير إكبر أو إدخـّل حتى أبـّا ألـّحبس إلا دعات الضرورة.

نالت إعجابو هاد المهنة بزاف أو كتاشف من خلالها الحب فى الحياة. كان كاينوب على صحابات الحال اللي بغاوْا إتحرّروا من الباطرونات أو تهديد الكوافورات: “عنداكي إتــّـحسابك كبر شانك حتى بديتي كاتــّـنفــّـخي عليّ، والله حتى نقولها ألــْراجلك. نسيتي الحـَوْلي الســّـعودي اللي لاح ليك 5000 درهم بين رجليك. شكون اللي ضبــّر عليك؟ أنا، يا نكــّـارة الخير!” شحال من راجل دخـّل خويا ألـّحبس لأنه تجرّء إطرش أوْ يركل مراتو، ولا ّ إقرّب ليها فى نصاصات الليل باش ياخودها “مارْش آرْيان”.

البعض من العيالات كايقاوْموا هاد الضّاهرة الحقيرة. ولاكن الأغلبية كاتستجب فى شمئزاز أو حزن ألـْطلبات رجالهم غريبة الأطوار، الخوف من الطلاق، الحشومة أو المضايقات اليومية سبابهم. صافط خويا شحال من واحد ألـّحبس اللي كان  كايفعل فى ولدو ولا ّ فى بنتو حتى حمـّلها. الجلسة كانت دائما كاتمّ فى جوّ كايتــّسم بحرفية عالية، ولاكن علاقتو الطيـيّبة مع أوزير العدل أو النائب العام اللي كايلعب معاهم  الگـولف شحال من مرّة وقفات معاه، إلا كاينصّ القانون على عامـَين حبس نافدة، طلب هو خمسة. أو إلا كان صاحبو لوزير ولا ّ النائب العام شكون اللي غادي يهضر معاه فى هاد البلاد؟

اللي حلّ فومّو يرعف ولا ّ نلقاوْا ليه السبــّة، أو تكون كولــّها مشوّهة، عرْجة لايحة على ضهرها هيضورة مرقــّـعة بالكدوب أو التــّبوحيط، خويا ما كانش كايحمل أبـّا. أو شكون اللي إلوموا؟ إلا طارت دبـّانة فى جهة الواليد أو هزّيتي فى صدفة يدّيك، كون على يقين أنه غادي إضن أنك حرّكتي عليها بالعاني غير باش اتـّسلـط عليه أو ما تخلـّيهش يعمل “لا سـْـيـَـسـْـت”. يمكن ألـْـكلمة بريئة تأدّي بيك لَـَـسـّبيطار ولا ّ تردّ منخارك حـْريرة جارية.

بحال شي درّي صغير، كان مسلــّم نفسو ألمزاجو أو هواه اللي نـَــتروا ليه “الـفــولان” من يدّيه. أب مغربي على حقــّـو أو طريقو، أناني، معاند، متمسك بريـّو، قاسي، ضالم غاشم.