د- مراد علمي

—

ما كونتش كانفهم هاد العالم الغريب. كيفاش كانوا كايسمحوا ألـْهاد الشطط إتــّوغل فى مجتمح كايدّاعي معتنق روح الإنسانية أو التسامح، هاد البلدان الغربية اللي كاتعرف اتــّحبـّب ليك باش تحشي يدّيها فى جيبك أو تحرز على متيازات سياسية ولا ّ صفقة كاتعدّ بالمليارات ديال الأورو. ماشي بيع لي ّ أو نبيع ليك، يعني نستفدوا بجوج، أنت أو أنا، ألا ّ! نبيع ليك أنا بوحدي طراموي، تـْران ولا ّ معدات حربية جديدة باش نجرّبها فيك، إيلا دعات الضرورة، أكيد.

هاد العالم ديال الحسابات، المساومة أو التسمسيرة ما عمـّرو عجبني، أبدا! أو كانضن حتى هو ما غاديش يرتاح ليّ. بقيت كانخمم مرة اخرى شنو يمكن ليّ نعمل بهاد الموهبة البسيطة اللي ما عمـّرها خانتني. كانقول بعد المرّات مع راسي بنادم ما خترع الخدمة غير باش إقـتول الوقت من نهار شاف النــّور. أو فى هاد الفترة كولـّها كايدكـّس حياتو بأولاد، مراة، هموم الدنيا، أوقات فرْح قصيرة. الحمد لله اللي لــْـقى ما إدير، ولا ّ كون شـَقّ راس جارو بكـْـترة الملل اللي حجب عينو. بقيت كانفكــّر أو قولت مع راسي علاش ما نحاولش نعمل شي حاجة باللغات الأجنبية، اللغة المغربية كونت كانتقنها، لغة امـّي أو لغة الحليب اللوّل اللي خدّرات ليّ بيه الدّات، من بعد تبعاتها العربية أو الفرانساوية اللي بقاوْا غرابين علينا ليومنا هادا، رغم شعارات رجال السياسة ديالنا اللي خبـّلونا أو ما عمـّروهم ورّاوْنا الطريق اللي خصـّـنا ناخدوا. حيت هوما بنفسهم باقيين كايقلــّبوا عليها، أو ما دوخلوا ألــْهاد اللجنة غير باش ينساوْها بالزربة، يا سلام على المْـعـلــّم “كافـْـكا”. قالوا لينا هزّوا الرّايات ديال العربية، غير باش إقولوا لينا من بعد ماشي هادوك، ديال الفرانساوية قولنا ليكم. حتى ما لـْـقات لا الفرانساوية لا العربية الطريق، لا ألـْـمخـّـنا لا لـَــقلوبنا. كون غير ستعملنا اللغة المغربية، والله ما يبقى حدّ أمـّي، بالطبع الفصحى غادي ديما تحتفض بمكانتها كالغة عالمة، موروت كوني، لغة الجامعات، الدين، الجرائد، البلاغات، الرسميات، ولاكن التدريس إكون بلغة الأم بحال الفينلادييين اللي كايستعملوا لغتهم اليومية.