كود كازا ///
ضيع الرجاء الماتش لكان باغي العبوا ضد سريع وادزم اليوم، بسباب تيران لمعندوش، وملقاش ملعب في العبو المباراة.
الرجاء كانوا معولين العبوا الماتش في ملعب مولاي رشيد لكيدربو فيه، ولكن المسؤولين ديال الملعب رفضوا اخليوه العبو الماتش، خافوا من الحضور الجماهيري لقدر اتسبب ليهم فمشاكل في الملعب خصوصا أن الرجاء عندهم سوابق مع ملعب مولاي رشيد، وفيما كتجرى فيه شي مباراة كيوقع شي مشكل.
المباراة تلغات بعدما الرجاء عياو اقلبوا على ملعب في اواجهوا سريع وادزم، خصوصا أن التران ديالهم بالوازيس، كيتصوب ومكينش تيران آخر في العبوا
ومن نهار جاء غاريدو للرجاء يالاه لعبوا جوج أو ثلاثة ديال الماتشات، في حين فراقي آخرين لاعبين أكثر من عشرة ديال الماتشات وهذا غادي اكون عندو تأثير على التنافسية ديال اللاعبين ديال الرجاء في البطولة، وهادشي لقال سلامي مدرب المنتخب حتى هو، بحيث قال أه كان خايف من لاعبين ديال الرجاء في الماتش ضد مصر لأنهم ممترنينيش مزيان.
