محمد سقراط كود ///

فالغالب فالممالك القديمة وبالنسبة للملوك والقادة لي دخلوا للتاريخ وقاموا بمنجزات ماقام بيها تاحد، كانت عندهم واحد الهيبة أسطورية كترفعهم من منزلة بشر، والبعض منهم كاع كانت كيعتابر راسو إبن للآلهة ، مثلا الإسكندر الأكبر لي كان ولد زيوس وآخيل ،و جنكيز خان لي تقريبا كان كيعتابر راسو اله و أن الولاء ليه خاص يكون أقوى من الولاء الديني والعرقي والأسري، وأصول فكرة أبناء الله تقريبا كانت عميقة أكثر عند الفراعنة ومنها انتاشرات حتى وصلات للمسيحية وداكشي وسيد القمني تعمق فهادشي في كتابه ايزيريس وعقيدة الخلود ، وفالإسلام الرسول كانت عندو قدسية بما أنه رسول الله، وصاحب الدين الجديد، هاد القدسية والهيبة لي ماحافضوش عليها الخلفاء ديالو كاملين وطريقة موتهم خير دليل حتى جا سيدنا معاوية رضي الله عنه، وأرسى دعائم الدولة الحديثة بهيبتها وعظمتها وجلالها منذ أن كان واليا للشام، فقد علم عنده عمر هذا وراسله بشأنه قائلا: واه أخا حنا كنموتو بتيقيقت وهنا وبشظف العيش ونتا عاطيها للظلول والراحة والتفاطح” فرد عليه معاوية: هادي راه الفلونتيرا أعشيري خاص البراني نبانو لهيه مهيوبين وعظماء ماشي بحال الى حطنا الكار من بن حمد.

وهاد الهيبة هي لي كتخلي الملوك والقادة واخا يكونوا قاسيين أو ظالمين( واخا أنا ضد هاد المفهوم)، وديكتاتوريين ولكن ملي كيموتوا كتبقى بلاصتهم كيفتاقدهم الشعب، كيبكي فموتهم كتجيه الهيستيريا كايدير المظاهرات والإحتجاجات ضد عزرايل على ودهم، مكيتقبلش قدر الله، وكاين لي كيعتابر الأمر نهاية العالم بحال موت ستالين، أو عبد الناصر، وكذلك المغفور له صحة المرحوم بلهلا يكزيه لشي حد الحسن التاني، هاد القائد العظيم لي بسم فترة من تاريخ المغرب أعادة بذلك ذكرى عظمة جده مولاي سماعيل الذي أحاط مكناس بأسوار بناها العبيد الأجانب فابور، وكذلك الحسن بنى مسجد الحسن التاني تقريبا فابور واخا كاين لي كيقول راه شاط الربح كاع، وكاين لي تغنى غي من بيع صكوك الغفران للشعب لجمع الأموال الكافية لبناء هاد المعلمة التاريخية التي نباهي بها الأمم اليوم، المغفور له كان قليل الظهور كاين شي شافو مرة فحياتو وكاين لي عمرو شافو ، خطاباته لازال يتذكرها معاصروه من جميع أفراد الشعب، الواليد عندي عاقل على كاع دوك الخطابات التاريخية ديالو وبالسنة كاع، بينما أنا يالله عاقل على خطاب أين الثروة للملك محمد السادس والرأس مال اللامادي، وبلا أي حنين ليهم، بينما الواليد كيعاود بحنين وفخر واندهاش واحترام لأنه عاصر ملك كان قادر يهلل وسط خطاب على الشعب، وهادشي هو لي خلا الواليدة تصدم وتبقى تبكي شحال نهار مات الحسن التاني، بينما أنا كنت متحسر فقط لأنهم قطعوا علينا أحد أهم حلقات سلسلة داي الشجاع لي كانت من أروع الرسوم لي دازو فأيامنا وعوضوها بالقرآن ومن بعد سيطر العلوي على التلفازة لأيام.

نهار موت الحسن التاني بحال الى توقفات الحياة لبرهة، حتى الهدرة فالقاع ديال الحومة ولات بهمس، ماجاناش النعاس وبقينا سامرين وكنشوفوا فالشارع وفالسطافيطات كيتجاراو، معرفتش واش كنا كنتسناو الدبابات يدوزو أو العسكر يدخل للمدينة ولكن فالغالب كنا كنظنو أنه يوم استثنائي وماغاديش يدوز كباقي الأيام، نهار لكنازة هبطنا للبحر لقيناه مطوق بالبوليس، جراو علينا ممنوع العومان أو الفرح أو المتعة والكنازة ديال سيدنا خدامة ماهذه الوقاحة، الحمد الله طنجة فيها شلا بحورة هبطنا لمرقالة لقيناها عامرة، دراري وعيالات وكولشي، فالشمال كبرنا على فكرة أن الداخليين كيبغيو الملك كثر منا، وكاين لي كيتمادى فهاد الفكرة وكيسميه الملك ديال لعروبية، لذا استغربنا مظاهر الحزن المفرط وجوه النساء لي نقلاتهم لينا القناة الوطنية، طبعا من خلال ملابسهم وسنانهم الطايحين وآثار البؤس على وجوههم باينين من سكان لقوادس، يمكن تقول متلازمة ستوكهولم ولكن سكان لقوادس هذا حالهم كيموتوا فراجل مهم.

حتى بعض رجالات النخبة اليسارية ولي كانوا فصراع طاحن معاه ديك الساعة، ولي جابتها الوقت وريحة معاهم من بعد، كانوا كيدويو عليهم بكل احترام ممزوج بمازوشية لذيذة وفخر بأنهم كانوا فصراع مع عدو بعظمة الحسن التاني بالنسبة ليهم، وحاليا دائما كيبقى العهد ديالو واحد البعبع لازال لحد الآن كولشي كيذكر بيه، وأولهم بنكيرن وسط البرلمان ملي فكر البرلمانيين على أيام مكان كيقدر تاواحد فيهم يهدر.

ميكافيلي كيقول على الأمير أن يجمع بين حب شعبه وخوفه ومن الأحسن خوفه، وهادشي لي كان داير الحسن التاني ولكن فالمقابل محمد السادس كيبغيوه بلا خوف، الى سولت عليه الواليدة غادا تقوليا الله يحفظو ولينا ويخليه لينا مسكين حبها ليه ممزوج بنوع من الأمومة وهاد مسكين مكناتش تقدر تقولها على الحسن التاني حيث حبها ليه كان بحال حبها لله ممزوج بخوفها من جهنم ومن العقاب وطمعا في رحمته وماشي ضامنة لها نظرا لحسن طويته، واش حيث محمد السادس كيتصور مع الناس بزاف، واش حيت متواجد ديما وحاضر وتقريبا أي واحد فينا غادي يكون شافو مباشرة على الأقل مرة فحياتو واخا يكون ساكن بنكرير، محمد السادس مؤنسن أكثر، الصورة لي عندنا عليه أنه قريب لينا أكثر من باه لي كان بعيد بحال الله وقريب بحال البوليس، لحد الآن باقا خطابات الحسن التاني كتدور فالأنترنيت وكتأرخ لفترة وأغلب التعليقات عليها كلها حنين لهاد الفترة بمازوشية قل مثيلها، على عكس محمد السادس لي الصور ديالو هي الوحيدة المنتاشرة فالأنترنيت في ظل غياب خطاباته أو أي شيئ آخر كيرمز للكاريزما ديالو، المغاربة شعب مازوشي زير معاهم السمطة يحبوك رخفها يطلعوليك فوق ظهرك ( أنا منهم).