محمد سقراط-كود

—

المواقع الإجتماعية ولات عامرة بصور قتلى حروب الشوارع ، وفيديوات ديال التشرميل فعباد الله ومن كاع المدن ، وآخرها فيديو واحد ضارب راسو وطالع فوق سيارة الشرطة وكيغوت “ومكايناش الدولة “، وقبلها بيوماين شفنا صور لقتيل سيدي بوجيدة ، وقبل بسيمانة شفنا مواطن كيصور شفار ، والشفار شادينو البوليس وكيهدد فالمواطن بلي راه غير شهرين وغيخرج ويفرعو ، هاد التهديد كيلخص كاع هاد الأوضاع لي كيعرفها الشارع المغربي ، وهو أن الحبس مابقاش عقوبة وكيردع المجرمين بل العكس مجرد فترة نقاهة ، ومستعدين يديرو ماكثر ملي يخرجو.

أغلب المتورطين فجرائم الشارع هم من ذوي السوابق ، يعني الحبس غير زاد عزز عندهم السلوك الإجرامي ، حيث فالمغرب راه ماشي عقوبة وانما هدر للأموال العمومية لا غير ، مادام انه مكاينش أشغال شاقة ، أو أعمال كيقوموا بيها الحباسة باش يخلصو حبسهم ، ومادام ان العفو يمكن يجي لأي واحد بغض النظر عن سلوكه داخل المؤسسة ، ومادام أنه مكاينش امتيازات لدوي السلوك الحسن والمنظبطين ، ومادام أنه باقي مكاينش عقوبات مشددة وطويلة فحالة العود ولو لأبسط الجرائم ، فراه عمر المجرم ماغادي يتردع مادام مايمكنش اعادة تأهيله حيث البلاد كلها خاصها اعادة التأهيل والإدماج فالحضارة ، لدا كتبقى أنجع وسيلة هي ردعه ، وهذا ما لا يوفره النظام السجني المغربي ، والدليل هو أن العديد من المجرمين مدوزين الحبس كثر من مرة ، وكاين لي فايت عشرة ديال المرات وبمعدلات كثيرة .

زيد على هذا ماتمثله تجربة السجن بالنسبة لواحد ولد حي شعبي ، أنها كتعطيه نوع من الإحترام والهيبة والمكانة كل ماكان الجرم أفظع ، وحتى تقبل الجريمة فهاد الأوساط والتطبيع معاها من قبل الأسرة ، والمسارعة فتوفير كل ما يريده السجين ولو على حساب قوت أسرته ، زد على هذا غياب الافق والمستقبل للعديد من أبناء الاحياء الشعبية ، وملي كتدوز الحبس كيبقى بحال شي لطخة عار تابعاك فحياتك الى بغيتي تدير عقلك وتروم الطريق ( وانا نيت عرقل ليا شلا حاجات فحياتي)، هادشي كامل كيخلي الشارع المغربي بحال شي غابة ، راه واخا كاع تكون مقاربة أمنية راه مكافياش في ظل أوضاع اقتصادية متدهورة ونسبة بطالة مرتفعة ومدرسة بلا دور تربوي ، وأسرة مغلوبة على أمرها جاهلة وكتنقل الجهل ديالها لعرام ديال لولاد ، والنتيجة هي مدن دايرة بأحزمة من الأحياء الهامشية لي كتفرخ الجريمة والتطرف .