محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008
حكيمة لعروسي كود ////
عاد الصيف وعدنا مع نفس النغمة التي نرددها كل سنة أملا في التغيير: بغينا شواطئ نظيفة …
بغينا نلقاو حاويات الأزبال و نلقاو الناس اللي تايجمعو زبلهم و يلوحوه في الأماكن المخصصة ويحافظو على نظافة الشاطئ ماشي تبدى تعوم و تلقى حداك قشروة دلاحة ولا بتيخة …. ولا تلقى دجاجة كحلة ميتة مأنتخة تاتعوم حداك مالها ؟؟ لا راه لاحوها على التابعة …..
بالأحرى بغينا نظافة العقول اللي كاتزور الشواطئ … وتانقصد هادوك الدراري اللي تايمشيو يتحرشو بالبنات ويقوليك حيت هي لابسة عريان و خا هو لابس شورط أو مايو معزول فيه بحال التمنية و باينة فيه غير الكرش بحال بوصيحة و جاي قاليك تايعاير لبنات و يقوليها تستري أو لا يشوف في خوها ويقوليه ديوث لأنه ماخداش حق الوصاية وولاية الأمر على ختو و بحالا هو من حقو يعوم و يتبرونزا وهي لا و نبغي نقول حتى للبنات اللي تايعومو بالبيجامات او البوركيني او الجلابة او القفطان و التكشيطة شغلكم هاداك ولكن ملي تشوفوا بنت لابسة المايو في البحر راه خاجة عادية ماشي خارجة عن المألوف راه انتوما اللي خارجين عن المألوف بهاد التقليعات الجديدة …
من فضلكم ماتبقاوش تخنزروا في بنت لابسة مايو ولا تعايروها ولا تحسوا براسكم أنكم أحسن منها لأن اللبس أو البوركيني ماشي دليل على العفة والطهارة ممكن تكون لابسة البوركيني غير حيت ماباغاش تبرونزا لأنها تاتمشي مع الخليجيين اللي نعرف عليهم تايبغيو البنات البياض ماشي السمورية أو ممكن تكون لابساه غير باش تخبي داك مشروع كاشير اللي عندها في جسمها الممتلئ بالدهون و السيلوليت ….
عمر المظهر ما كان دليل على الجوهر آذن نقيوا عقولكوم باش مشروع بونظيف ينجح … لأن العقول الموسخة تاتنتج لينا شواطئ موسخة بالزبل البشري و الفكري.
رسائلي للكبار فما لا الكبار سنا .
الله يجيب اللي يفهمنا ولا يعطيناش .