محمد سقراط كود ==

فالحكومات السابقة كانت الفضائح هاي كلاص وكبيرة وعندها ضحايا كثار، بحال فضيحة النجاة وعدة فضائح أخرى، ولكن مع الحكومة الحالية داكشي تشخصن بزاف، ومستواه هزيل غارق فالإسفاف، وكيتماشى مع موجة التفاهة والشعبوية لي كيعيشها المغرب فعدة مشاهد سواء الفني سواء السياسي، فالعهد الجديد للفضائح السياسية المغربية، كتلقى غي فضيحة الشكلاط، فضيحة التمر، فضيحة بشكيطو، فضيحة الحب الوزاري، فضيحة برتوش لوزير، الموشكيل فهادشي هو أنه كيخلينا نتعاملو مع المسؤولين الحكوميين كنجوم التلفاز ماشي كوزراء ثم انتخاب حزبهم من قبل الشعب، خبارهم فالجرائد مابقاتش كتخرج فالصفحة السياسية وإنما فصفحة الفضائح وأخبار الفنانين وداكشي.

فالعهد الجديد أصبح وزراء الحكومة تتم تتبع أخبارهم جنبا لجنب مع الداودية وعادل الميلودي، بحال الى مكيديروش السياسة وإنما كيغنيو فالكاباريات، آخر ما سمي بالفضيحة فالسوق هي برتوش الوزير عمارة، ولي ناضت عليه حيحة اظطرت الوزير يصورو ويحط الثمن ديال داكشي الحقيقي، الموشكيل هو فتفاعل المغاربة مع الأمر لتحوله لفضيحة، فاللول كانت الفضيحة أن البرتوش مقيوم بثمن خيالي، وملي كذب الوزير الأمر، ولات الفضيحة هي احتواء مكتب الوزير على برتوش، بما يحمله هذا المكان فالمخيلة الشعبية من حمولة جنسية ورعوانية.

لمغاربة لقدام لي كان مسك عليهم الله فالحواضر، كانوا كيديرو الداروحداها كيديرو الدويرية لي هي دار صغيورة ولكن معزولة بجميع مرافقها الحيوية ومستقلة على الدار، الدار للموالين الدار، والدويرية لعابري السبيل والليالي الملاح وهاد الليالي كان البعض منها عندو طابع ديني بحال ليلة كناوا مثلا واخا كانت كتكمل بالروج وحك جر، هاد الثقافة ديال الدويرية نداثرات من بعد، مع تغيير البنية الإقتصادية والإجتماعية وتقوي دور المرأة فالمجتمع، شحال هادي راه ماسوقهاش أما دابا راه هي اللولة تجيبليك البوليس، عليها بنادم لي فاتح عليه الله وللى كيدير دويرية ولكن أبعد مايكون على نطاق المادام والوليدات ، الشباب المغربي كبر وهو محنسر فبرتوش، حلم الشاب المغربي الشعبي هو يكون عندو برتوش ديالو حر فيه، نهار شي واحد من شي كليكة كيدبر فبرتوش راه الكليكة كلها كتدوز منو، البرتوش بقا فالذهن ديالنا هو ديك لبلاصة لي كتحرر فيها من سلطة الأب وسلطة المجتمع ولتقاليد والعادات، البلاصة فين كتبغي تعيش حياتك كإنسان حقيقي ماشي كمغريبي مكبوت مقموع، لذا فبمجرد ما ذاع خبر توفر مكتب الوزير على فراش ودوش، فكولشي مشا بالو للبرتوش ولفعل التبرتيش( التبرتيش أي ممارسة الجنس)، ومع الحكومة الحالية ماناقصاش قصص ديال الحووب، فولات الفضيحة هي توفر مكتب لوزير على فراش ودوش، والتسائل آش كيدير فيهم الوزير.

بالنسبة للشباب المغربي لي تربى فوق السداري ديال الصالون وعمرو نعس على فراش ديال جوج فغرفة خاصة ديالو، فراه الفراش بالنسبة ليه للمتزوجين أو للمبرتشين فقط، أما لي بوحدو فراه السداري كافي، وهاد النوع هو لي ماكايشري بيت النعاس حتى كيقرر يتزوج، أما محدو زوفري فراه لا معنى لتوفره على سرير خاص، والسرير فالاوعي ديالو بلاصة ديال ممارسة الجنس ماشي ديال النعاس فقط، لذا فقد تكالبت هاد الماركة على هاد الخبر، وبالنسبة ليهم الحمام هو مرة فالسيمانة(فأحسن الحالات)، والى مشيتي ليه قبل فراه غي باش تحيد جنابة، وكذلك الدوش، فراه مكان ماشي للنظافة الشخصية والشعور بالإنتعاش وكيحيد لعيا وإنما لغسل جنابة، والى تحمحم بنادم أو دوش فراه داير علاش، هاد الماركة هوما لي تكالبو على سيادة الوزير فالمواقع الإجتماعية، كيتسائلو كقردة البامبو، على واش هاداك بيرو أو بلاصة النعاس والدوش، هاد سكان لقوادس ماعارفينش أن بنادم بحال سيادة لوزير نورمالمون راه كيدوز وقت كبير فالبيرو، وكيولي مكان العمل ديالو كياخد جزء كبير من حياتو، لذا فراه خاصو يدوش فيه يدير فيه لاسييست يرتاح فيه، ماشي ضروري حيث عندو فراش ودوش فراه غادي يبرتش فيه راه وزير هادا ماشي علال القادوس الله يهديكم.