كود محمد سقراط /////

فرمضان قلنا هانية القطعة دايراها، رغم تتالي الأحداث الهمجية المروعة وقلنا غي غادي يخرج رمضان ويحلو البيسريات ويسافر بنادم ويدور ويتبرم ويفرح لقريد غادا تصفى النفوس، ولكن للأسف تتالت علينا الحوادث البشعة المصورة هاد ليام، في ظل اندهاش مستعملي الويب المغربي من حالة الإنفلات الأمني الغير مسبوق لي وللى كيعيشها المغرب، ومن خلال التعليقات كاين لي بدا كيطالب بتطبيق الشريعة كاين لي طالب بتدخل العسكر، وفحالة الفيديوات ديال الشفارة الأغلبية كانوا كيبررو عملية الإعتداء عليهم من قبل الجماهير الغاضبة ، وكولشي كيحس بحال الى نتاقموليه وأغلبهم سرد قصص وحوادث تعرض فيها للكريساج من قبل دراري لا شفقة لا رحمة كيعتابرو أي واحد غادي على رجليه رايط فشي قنت مجرد ضحية.

والقاسم المشترك فالناس لي تفاعلو مع هاد موجة فيديوات العنف والجريمة والقصاص الجماعي، هو أنهم يستنكرون هادشي كأنه دخيل على ثقافتنا كمغاربة، إيييه عندهم الحق حيث أول مرة كيشوفوه مصور بديك البشاعة والدموية، ولكن فالواقع هو كاين ويمكن القول أنه نقص شوية كاع على شحال هادي، ولكن كنظن أن السبب فهاد ردة الفعل الفجائية من قبل البعض هو نكران الحقيقة لي معشش فالذهن ديال لمغاربة.

المغريبي فالغالب ديما ناكر لقوادة لي كيعيشها، ديما باغي يزين واقعوا باش يقدر يتقبلوا ، ديما الحمد الله عندنا الأمان، واخا هو متفق عليه بين المغاربة أنه كاين أحياء مايمكنش تدخل ليها فوقيتة معينة، كاينة أماكن مايمكنش تجبد فيها بورطابلك تدوي فيه، ملي تمشي للبحر ديما خلي شي حد مع لحوايج عنداك يطيرو، كاين بلايص مستحيل تلبس فيهم البنت لي بغات وحتى الى لبسات فساعات محددة مع مراعاة الشعور الوطني بالكبت، المغرب بيخير فيه بطاطا والكزارة كثار والخضرة موجودة والسويقات ، أييه هادشي كاين ولكن لي متافقين عليه لمغاربة بيناتهم عاوتاني أن اللحم غالي ومكايكولش بنادم ديما وهكذا ، المغرب ديما مسوق راسو بيخير واخا هو واصلة فيه للعظم، هادشي لي واقع ملي كتقرى التعليقات كتخايل أن المغاربة بحال الدانمارك وأنهم أمام حالات شاذة أول مرة تطفو للسطح ولكن فالأصل وكما قلت في مقال سابق لي ( هاد اللعيبة مكنحملهاش وعامرة عياقة ولكن جابتها الضرورة)، حنا كنعيشو مرحلة توثيق سلوكاتنا كمغاربة بالفيديو وكنعيشو مرحلة تعرفنا على شعبنا وراسنا الحقيقي، ماشي داك لي كنتوهمو أننا هو.

من 2001 حتى ل2004 وأنا كنبيع ونشري فالأسواق الأسبوعية ديال جبالة، وحضرت على جوج عمليات قتل جماعي لشفار، وحدة فبني حسان ووحدة فالكرافطة، وللأسف مكانش باش نصوروا داكشي، أما حالات الضرب والسلح فعديدة وواحد الحالة واحد المرة فالخميس بني عروس شدو شي وحدين خونوا شي كيف لواحد راه كواوهم بالجناوا محميين فوق العافية فوجوههم ولحمهم نكلوا بهم، من ناحية المضاربات بالجناوا وداكشي راه الأمر عادي جدا فالأحياء الشعبية وكبرنا فيه وضربنا وتضربنا( ضربة وحدة الحمد الله فالغالب كنت كنهرب)، هادشي جد عادي بالنسبة لحي شعبي، ولكن ملي وللى الأمر كيتوثق بالصوت والصورة وكينتاشر فلانطرنيط خلق جدل وديما المطالب كتكون عبارة عن توفير الأمن و اعطاء أشد العقوبات .

ولكن واش الحبس فالمغرب عقوبة، واش ملي كتكون فيه كتحس براسك بصح كتعاقب، مكنظنش بحكم أنني جربت منو جوج ، واحد سايب وواحد ديسيبلين، الحبس فالمغرب مجرد هدنة مؤقتة لبعض المجرمين باش يربيو الصحة ويرتاحوا شوية باش يخرجوا أشرس وأقود وأكثر جرئة ومعرفة، الحبس فالمغرب غي كتدخليه ومن ورا السيمانة اللولة والى كنتي خصيم وشديد كتقول مع راسك صافي هذا هو الحبس طزززززز تعاقبنا بكري، بحال لوطيل بالنسبة ليعندو الفلوس أو الصحة أو الذكاء وبحال الجهنم بالنسبة لي معندوش هادشي، كتدخل مجرم صغير كتخرج بديبلوم فالإجرام، وحتى ملي كتخرج كتكون طيرتي الخلعة من الحبس، وأكبر موشكيل فيه هو القفة ديال الواليدين لي كتضصر وتفشش وتخلي الحبس يزهى ويزيان

أول مؤسسة خاص تهتم بيها الدولة الى بغات تحد من الجريمة هي السجن يولي بنادم يخرج رايم الحيط بالإظافة الى العقوبات الطويلة الأمد، غبر ليا بنادم على السيفيل، راه البوليس تكرهو من أنهم يشدو شفار ويجريو ويتجاراو من وراه وفاللخر يمشي للمحكمة ياخد 6 أشهر، يربي فيها البوادر والكريطينة ويخرج عاوتاني آرى جري يا ماتجري، وبالإحصائيات راه حالات العود هي لي كثيرة، بنادم كيدخل كيعجبوا الديكور، خاص يدخل يتردع، وخاص أيضا البوليس المغربي يبدى يطلق القرطاس يفرجنا شوية، لاش هازين دوك لفرادة لاش الى ماغاديش تخدمو بيهم وخلينا من داكشي ديال طلقة انذارية فالهواء، أخوي الشارجور فالباشار لي يستاهل، وأرى معندك.

راه الحاجة ماركاريت تاطشر ماقدات على ظاهرة الهوليكنز ماشي بالتخربيق ولكن بالعقوبات الحبسية المشددة وبقبضة حديدية حتا رام بنادم للحيط وهانتومة كتشوفو النكالزة كيفاش ولاو كيتفرجوا من بعد ماكانو كتطيح عندهم الرواح بين المشجعين.