محمد سقراط كود ///

فكوريا عندهم واحد المثل شعبي كيقول أنهم الى ناضت شي حرب بينهم وبين شي بلاد يسيفطوا ليهم غير القاصرين وغيغلبوها ، بحكم أن هاد الفئة بالظبط عندهم جانحة بزاف ومن الفوق محمية بالقانون لأن العقوبات عندهم بسيطة حتى فجرائم كبيرة بحال الإغتصاب، وكذلك حتى فاليابان وبريطانيا وعدة دول أخرى وفميريكان كاين إسم خاص بهاد الظاهرة لي كانت كثيرة فالتمانينات حتى لتسعينات كيديروها عوازة والاتينوس، وكاين وثائقي حول هاد الظاهرة ، غير هو فهاد المجتمعات ملي كتوقع شي جريمة بحال هاكة، المجتمع كامل كيحس بالمسؤولية وكينوضو يتحركوا ، فمثلا فكوريا واليابان ظهرو أفلام لي كتعالج مثل هاد الظواهر مقتبسة من قصص حقيقية، كذلك تطرح نقاش مجتمعي، وبحال هاكاك فبريطانيا ، وفعدة دول خرى .

غير هو فهاد الحفرة كتلقى أي جريمة وخصوصا ضد المرأة ، المجتمع كيدين المرأة على حساب الجاني ، هي لي مالابساس هي لي ضصراتهم ، هي لي حزقات حداهم ، هادوك غير دراري صغار معندهم عقل ، مكانش عليها تكون معاهم ، والموشكيل لكبير هو التطبيع مع مثل هاد السلوكات، ويولي متصالح معاهم المجتمع ويدخلهم فخانة لعب الدراري، راه هاداك الفيديو ديال اغتصاب البنت فالطوبيس صادم حقا، ولكن لي صادم كثر هو التعليقات والأراء ديال الناس لي كيبررو داك الفعل الحقير، راه هادو هوما الفيروس المجتمعي الحقيقي ، ومن هنا كينبع الموشكل الحقيقي وهو التصالح مع مثل هاد السلوكات وعدم تحمل مسؤوليتها كأفراد وكمجتمع .

الأم كتقول راه مسكين غير ظلموه مكان معاهم وكيجي هو اللول فالمدرسة وصحابو داوه معاهم صحة، ولاد الحومة راه الدرية لي شمكارة وهي لي كتجيبليهم داكشي وأصلا راه كولشي مخدر فالحومة وحيدو لينا التيران مابقى فين نتلاهاو، المعلقين فالفايس : راه الدرية لي لابسة هكاك راه هي لي ستافزاتهم ، المناضل : هادشي نتاج لفساد الدولة ، اللحية : هادشي بسباب اغلاق دور القرآن ، وكنبقاو هاكة غادين فعدم تحمل المسؤولية وتلصاقها فالحلقة الأضعف ولي فالغالب هي الضحية ، بينما فالحقيقية راه الضحايا هوما حنا كمجتمع وكبلاد أصبحت غير قابلة للعيش .