حكيمة لعروسي كود ////
اشنو علاقة الرقص بالجنس ؟ ؟ ؟ علاش ديما ناس معينة (وماتانعممش ) ملي تايشوفو الرقص تايحسو باثارة جنسية ؟ ؟ فين كاين المشكل فيهم او في الرقص او في جسم الراقصة نفسها ؟ ؟

نديرو تحليل بالعقل والمنطق ونعرفو المشكل فين !!

اولا بزااااف الناس عندهم عقدة الخوف من الجسد و مامتصالحينش مع اجسادهم و اجساد النساء أو لاجمال تايخلعهم بدل ان يعجبهم و يستمتعو بيه لانه تايستفز المشاعر ديالهم حيت عندهم جوع جنسي ….. يعني واحد محنسر وتوريه جسد يتمايل راه يموت فيها مايتحملش …… لهذا تايحسو بالاثارة ملي تايشوفو جسد امرأة ايا كانت ماشي غير الراقصات وكاين اللي وصل بيهم المرض النفسي اللي سبابو هاد الجوع الى رؤية الاثارة في اجساد الحيوانات والاطفال ووصلات بيهم الحقارة و الكبت الى اشباع رغباتهم باغتصاب البراءة … وزنا المحارم ….

أنا معاكم أن الجنس يحرك العالم وان طبيعة الانسان فيها جزء كبير من الشهوانية كاين الانسان السوي اللي تايتحكم في شهواتو وكاين اللي تايوصل لدرجة ان أي حاجة تاتحرك ممكن تثير شهوته وخا تكون غير ميكة طايرة مع البرد …

فما بالكم يشوف راقصة قدامو تاتحرك لأن بكل بساطة المشكل عندو هو ماشي عند الراقصة بدليل أن كل واحد فيكم أكيد حضر عرس أحد من العائلة وشاف امه او اخته او بنت الجيران ترقص والسؤال هنا هو علاش ملي تاتشوف أمك أوأختك ترقص ماتتحسش بشهوة جنسية ناحيتهم بينما بنت جيرانكم اللي تاتشطح معاهم في نفس البيست ممكن تحرك شهوتك الجنسية ببساطة لأن العقل هو المحرك للشهوة ماشي الراقصة تماما كما يحدث مثلا مع دكتور النساء ممكن يشوف عدد كبير من النساء عاريات في الفحص ويفحص الفرج و الثدي ديال المرأة بدون أن تتحرك شهوته الجنسية مع أنه رجل عادي ويمارس حياته الجنسية بشكل طبيعي خارج اطار العمل لكن في المستشفى كايشوف العيالات على انهم حالات وأن هذا عمله وبزاف ديال الرجال في مجالات متعددة كايتعاملو مع النساء و ممكن يشوفو اوضاع بزاف ممكن انت تشوفها قمة في الاثارة ولكن هوما تايشوفوها كعمل حتى بالنسبة للدراري العرب اللي تايكونو خدامين في الصيف في اوتيلات في اوروبا حدا البحر والبيسين والاوروبيات عريانين حداهوم وهوما صايمين في رمضان و ماتيتهزوش من بلاصتهم بينما من ورا الفطور تايبداو يشوفو ويحسو بشهوة جنسية مع نساء لابسين كساوي اذن كيف نفسر ذلك ؟ ؟ ؟

اترك الرد لكم
رسائلي للكبار فهما لا الكبار سنا
الله يجيب اللي يفهمنا ولا يعطيناش