سهام البارودي كود /////

ليوم تفرجت فواحد البرنامج ف Arte, حلقة سميتها” آخر مستعمرة” كايهضرو فيها على مخيمات اللاجئين فتندوف و كايصورو حياتهم و “القضية” ديالهم عبر واحد الشاب صحراوي ولد المخيمات…تزاد و كبر فمخيم لاجئين و كمل قرايتو فالجزائر.

الحلقة كان باين انو فيها واحد التحيز كبير للموقف الانفصالي! بالاضافة لمسألة انهم خداو غير الرأي ديال طرف واحد من اطراف النزاع لي هو اللاجئ بالمخيم و بعض قادة البوليزاريو فداخل و خارج المخيم! كان هناك تغييب متعمد للموقف المغربي ! التحيز كان واضح و لكن المسألة عادية حيت الاعلام ماشي ديما طرف محايد !

وانا كانتفرج فداك الروبورطاج تفكرت الوفد لي مشا من المغرب باش يدافع على القضية الوطنية الاولى فالسويد !! قارنت بين لي كايدافعو على القضية ديالنا و لي كايدافعو على القضية “ديالهم”! اولا خاصنا نفهمو انو الصراع اليوم بين المغرب و البوليزاريو بقدر ماهو صراع ديبلوماسي فراه صراع كاتلعب فيه الصورة دور كبير بزاف ! الصورة لي الخصم ديال المغرب كايعرف يلعب بيها احسن من المغرب و كايوظفها بذكاء ! كيفاش يمكن للمغرب يسيفط ناس يدافعو على الصحرا و يهضرو على الصحرا و يعطيو الحجة و الدليل على انها مغربية و هوما كاملين ساكنين فمحور الرباط الدار البيضاء ! راه لي خاص ليوما يدافع على مشروع الحكم الذاتي و يهضر على الصحرا هوما صحراوة لي عايشين تما، لي كبرو فتراب الصحرا و عارفينها و عارفين قبايلها و عاداتها و تقاليدها، مايمكنش يمشي يدافع على الصحرا واحد ماكايفهمش الحسانية ولد فاس و لا ولد الرباط… كان الأولى انو ولاد الصحرا هوما لي يمشيو يدافعو على مخطط الحكم الذاتي و يبينو للأوروبيين انو المغرب ماشي داك المستعمر الغاشم لي مسيطر على “آخر مستعمرة” فايفريقيا كيما سماوها ف Arte !

الخصم ديال المغرب ليوم كايلعب بزاف على الصورة بشكل ذكي ! الخصم عندو ولادو شباب كايقراو فاسبانيا و كايهضرو الاسبانية و الانجليزية بطلاقة و كايدافعو على وجهة النظر ديالهم قدام وسائل الاعلام العالمية و كايصورو راسهم على انهم ناس مسالمين عندهم الصبر لي كايمتازو بيه ناس الصحرا ! كايصورو راسهم على انهم اصحاب ارض ضحايا الاستعمار و كايوظفو اللغة و اللباس و العادات و الصورة فخدمتهم… الخصم ديال المغرب كايلبس الملحفة فاش كايكون كايلقي محاضرة فشي جامعة دولية كايأيد فيها الاطروحة الانفصالية … الصورة مهمة ! و باش الدفاع على اطروحة الحكم الذاتي يكون عندو مصداقية خاص لي يدافع عليها يكون ولد و لا بنت الصحرا ! كبر فترابها و شرب الشاي (تيا) ! و عارف بلي “الوتة” هي الطونوبيل بالحسانية …

كاينين عندنا صحراوا وحدويين يؤمنون بالفكر الوحدوي وكاينين منتخبين عندهم الشرعية الشعبية وكاينين عائدين تركوا فكرة الانفصال ورجعو للبلاد ! ناس عاشو فالمخيمات ولا كيعرفوها! كلاو البطاطا و الطحين و السكر ديال برنامج الاغذية العالمي هادو هوما لي يمكن ليهم يهضرو على شنو واقع تما و يدافعو على اطروحة الحكم الذاتي و تكون عندهم مصداقية اكثر قدام المنتظم الدولي حيت ولاد المنطقة، ماشي واحد ساكن فبير قاسم و غادي لابس كوستيم كرافاط و باينة عليك النعمة غادي تهضر على معاناه اللاجئين فتندوف و على التلاعب فالمساعدات الدولية و دافع على الحكم الذاتي!

في المقابل الخصم ديالك لابس ملحفة صحراوية كايصور روبورطاجات من قلب الخيام ديال بنادم ضاير بيه الذبان و جيعان و كايقول للعالم هانتوما شوفونا كي محكورين !! الصورة كاتلعب دور كبير اليوم ! اميناتو حيدر كاتسارا العالم بالملحفة الصحراوية تعبيرا منها على الانتماء لديك الارض ! خاص تا المغربي و لا المغربية لي غايدافع على وجهة نظر البلاد يكون لابس ملحفة صحراوية و موالف بيها وولد او بنت المنطقة … الأمر يبدو تافه بالنسبة للبعض غايقوليك وايلي واش بقات فالملحفة ؟ ايه مابقاتش غي فالملحفة ولكن راها جزء كبير من واحد الصورة كاتسيفطها للعالم عن شكون نتا ؟ منين جيتي ؟ و شنو باغي؟ الملحفة السحنة و اللغة كلهم عناصر كاتعطيك مصداقية قدام الناس لي كايسمعو ليك!

كاين واحد السكيتش مشهور بزاف ديال الثنائي الهناوات! كايتشد فيه واحد فيهم سميتو “عباس الوتد”! و كايجي عندو خوه للكوميسارية باش يخرجو و المشكلة خوه صمك أي حاجة كايقولها ليه عباس الوتد كايسمعها مقلوبة وهكاك كايتقاتل معاه باش يفهمو علاش تشد و شنو خاصو يدير باش يخرج ! فاش كايقوليه”واا عيط لمي الواليدة قوليها راني تشديت” و كايدير صبعو تحت فمو زعما اشارة للوشام لي دايرة مو باش خوه يفهمو! خوه كايجاوبو “هاه؟ واش شدوك مع ساطة ؟؟ درية ؟؟”! تما كايجاوبو عباس ” وااا زيد غرقني ا الصايمك زيد غرقني”
التعامل مع قضية الصحرا ليوم خاصو يخرج على داك الاطار التقليدي ديال البيانات و الوقفات فالرباط ! المشكل ديال الصحرا خاص يحلوه ولاد الصحرا ! و الا غادي تلقا الدولة راسها تاهي مغرقها “الصايمك” !!!