نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري
كود الحسيمة ////
فهاد اللحظة التاريخية اللي كيعيشها الريف وطبعا معاه المغرب خاصنا نسمعو اصوات واخا ما نتفاقوش معاها فكلشي. خاص نسمعو مع كل واحد كيتكلم بقلبو وباغي يتجنب الاسوأ لبلادو لهاد المشترك بين المغاربة. محمد زيان الامين العام للحزب الليبرالي في فيديو ل”العمق” كان صريحا صادما.
اش قال زيان؟
قال باللي العنف والعسكرة غادية تعطي فالريف ما عطات طانطان فالصحراء: اي البوليساريو والانفصال. اعتبر ان الناس محكورين مطحونين وانه ما كاينش شي حد يستحق على قبالو توقع مواجهة مع قبائل الريف.
زيان اضاف انه “كورياغلي كحفيد عبد الكريم الخطابي” ما موجودش فالمغرب هادا للي على قبالو نغامرو ونوجهو قبائل الريف
كما وجه نصيحة الى الملك محمد السادس وقال “من الافضل يدخل سيدنا بالزربة بالمغرب ويتبث فالمغرب ويشوف قبائل الريف اش بغات”.
وما نساش يهاجم الطالبي العلمي ديال الاحرار وقال باللي “لا قيمة له سياسية لا تاثير له يجي يقول ان هاد الناس كيمولوهم الخارج” ووصف وجود سياسي بحال خالد الناصري بلا ما يسميه ب”الخرافة” وتساءل “واش لشكر كيعرف الريف. كيعرف حتى دارو” واضاف “علاش العثماني ما يطلعش للريف”
ختم هاد الخرجة بان هاد لغنا ما غادي يدينا فين ثم طالب باش ما يبقاوش يحكرو عليهم “من الافضل ما تفكروناش اننا ريافة فالاصل. ناسيين قبيلتنا عروقنا وباغيين نمشيو للامام من الافضل ما تشعروناش نكونو ريافة قبل المغاربة” وطالب الحكومة بالاعتذار على اساءاتها للريف ولا هاد الشي ما غاديش يمشي على خير