محمد سقراط كود ////

هاد الأيام واحد الشاب يمني قتلوه رجال الدولة على ود منشوراته فالفايسبوك ، وحقا هذا أمر غير انساني أنك تموت على ود ستاتو ، بل أمر غبي ، خصوصا و أن الشاب على خلاف باقي اليمنيين لي كيبانوا فقناة العربية لابسين لتحت خرقة ديال الحياتي ولفوق قميجة وفيستة ديال الأستاذ التليدي ديال العربية وحنكهم منفوخ بالقات ، هاد الشاب على خلافهم كان بوكوص ولابس حوايج القيسارية ، داكشي ديال الوقت واخا هنا كيبانلينا حوايج القيسارية ولكن فاليمن راه كيبان بحال الحطات لي كان كيضرب برينس ، وهاد الأمر خلا العديد يتعاطفوا معاه بناء على شكله وما كان يكتبه في الفايسبوك من تاعنابت فحق الله عز وجل .

ومن غير هاد الشاب كيموتوا الناس بزاف فاليمن بسبب الحرب الأهلية والإقليمية وتنظيم القاعدة وتنظيم الدولة ، المهم القرطاس غي كيتشاير في كل الاتجاهات ولا يستتني أحدا، وطبعا كيموتوا شباب مكانش عندهم الفايس ، أو كان عندهم ولكن دايرين ففوطو دوبغوفايل تصويرة كريستيانو، وكيبارطاجيو الفيديوات ديال الضحك والمنشورات الفاتي فلوغية، وكيموتوا أيضا لي باقي موصلهم الأنترنيت كاع ، وكيموتوا بالأنواع والأشكال ومن مختلف الفئات والطوائف ، ولكن شنو لي خلا موت عمر أنه يلفت الإنتباه ويهتموا بيه العديد من المدونين والناشطين الفايسبوكيين الشهيرين فمختلف الدول العربية ، هو أن هاد خونا كان من صحاب أنقذوا الذلافين ديال اليمن ، ونهار وماطال وهو كينشر ستاتوات ديال أنظروا الى انسانية الغرب وهمجية الشرق ، أنتم ترون الله في القبور و أنا أراه في الزهور ، راه هاد الجملة كون كتبها فأي نظام شمولي آخر فالعالم من أي مرجعية كان غادي يموت، وخصوصا فاليمن فأن ترى الله في الزهور فاليمن فإما نتا ملحد أو لوبية وكلاهما أسباب للموت في اليمن بالإظافة الى أسباب أخرى أكثر سريالية ، على بحال هادشي عتابروه شهيد الكلمة والفكر ، وقد اغتاله الظلام وقريب يحطوه حدا مهدي عامل وفرج فودة والمفكرين الكبار لي بصح غتالهم الظلام .

الكفر جا حتى عند العرب وتمت قطعنته، كتلاحظ أنه وللى عندنا قطيع آخر من الكفار  لأسباب هرمونية، ومشكلين بحال أخوية يتباكون على بعضهم في المنادب ويفرحون لبعضهم في الأفراح وكيحس بلي أن الفكرة كتآخيه مع الآخر، لدرجة يعتابر موت خاي عمر خسارة للفكر الحر، وكتبدى تقرى كان عمر شمعة يضيئ الظلام ، زعمة كان يظيئ الظلام كثر الصواريخ والقنابل لي كيلوحهم التحالف العربي تما، لا أخاي الكافر من برشيد راه نتا وعمر ماعندكم حتى شي حاجة مشتركة وآخر حاجة هي يكون مصيركم مشترك ، نتا مصيرك معانا هنا مع مول الكاسكيطة مع بنكيران مع الياس هادو بصح بطريقة ما كيأثروا فحياتك وعندك معاهم قواسم مشتركة ، أما داكشي ديال تتخاوى مع بنادم بالفكر لا أخاي الفكر مكيخاويش ، موكة لي كتخاوي .