الرئيسية > آراء > أنا ضد العدالة والتنمية وضد المتدينين ولكن ضد تزوير الحقائق واستصغار المتلقي من طرف هادو لي كالو نصوتوه عليهم باش نحاربوا الظلام راه الظلام جابوا المخزن
25/09/2016 09:00 آراء

أنا ضد العدالة والتنمية وضد المتدينين ولكن ضد تزوير الحقائق واستصغار المتلقي من طرف هادو لي كالو نصوتوه عليهم باش نحاربوا الظلام راه الظلام جابوا المخزن

أنا ضد العدالة والتنمية وضد المتدينين ولكن ضد تزوير الحقائق واستصغار المتلقي من طرف هادو لي كالو نصوتوه عليهم باش نحاربوا الظلام راه الظلام جابوا المخزن

كود : محمد سقراط///

من بعد المسيرة التاريخية لي كانت من أجل أن بنكيران يخرج لينا من الصحراء ، قلت مع راسي صافي هاد البلان جربوه ماصدقش وتشوه ، وحسب موقع كود فالملك غضب كاع على هادشي ، والداخلية قالت غادي تفتح تحقيق ، ولكن عمري ماكنت كنظن أن الصفاقة والوقاحة ديال هادوك الناس يمكنليها توصل لدرجة القيام بحملة على الويب ، بداوها بصفحة خاصة ديال بغينا التغيير ، وبفيديو أقل ما يقال عنه أنه فيه تضليل حقائقي واضح واتهام كبير لطرف معين على حساب آخر ، وكأنك ملي غادي تصوت غادي يجي التغيير من أجل مغرب حداثي متمدن متحضر ومتنور ، ومن بعد تبعوه بأغنية للرابور المغربي الموتشو ، كيدوي فيها على أكدلة المغرب ( أكدلة نسبة الى حي أكدال)، على تعميم تجربة حي عصري كأكدال على المغرب من بعد ماغادي نصوتوا من أجل التغيير لي غادي يحبس زحف لخوانجية من الأحياء الأخرى كالتقدم وجبل الرايسي وجي سانك .

واش بصح المغرب كيعاني من محاولة أخونته من طرف العدالة والتنمية ، بحال الى المغرب بصح كان حداثي وقت ما ، وحاليا كنعيشو الزحف الظلامي ، المغرب تخونج منذ التمانينات والمخزن هو لي خونجوا ، ملي طلق صحاب الدعوة والتبليغ كينشروا الإسلام السعودي فالقرى والبوادي والأحياء الشعبية ، وطلق الجماعات الإسلامية فالجامعات لمحاربة المد اليساري ، وفلوس البيترودولار كتدخل والمغاربة كيمشيو أفواجا لأفغانستان يجاهدوا ، وميريكان راضية على هادشي ودارتوا فالعالم كاملب سواء الإسلامي أو المسيحي بحال أمريكا الاتينية لي دعمات المحافظين فيها والعسكر ، ومن داك الوقت والمغرب غادي كيتخونج شأنه شأن باقي الدول الأخرى منها مصر منها الجزائر لي عاشت العشرية السوداء ، والنتيجة هي هادي شعب سكيزوفريني تالف ، ضد صحاب اللحايا وضد الحريات الفردية فنفس الوقت.

النتيجة ديال هادشي كانت ظهور هاد السلوكات الإزدواجية عند الكائن المغربي ، لي كيبان عصري المظهر ولكن فنفس الوقت فالداخل ديالو كيقدس الخرافة وكيآمن بالجنون والسحور ومستاعد للتوبة عند أول نكسة تلاقيه ، وهادشي ماجابتوش العدالة والتنمية راه هي براصها وليدة تلك الفترة ونتيجة ديالها، إييه بغينا مغرب حداثي وراه غاديين ليه بغينا أو كرهنا ، حيث الحداثة كتعني نوع ما من الديمقراطية مع شوية ديال التحسن الإقتصادي مع بزاف ديال الإستهلاك لي كيخدم فمصلحة آلهة الأرض،( موالين موكة )، المغربي معندوش خيار كما يتوهم ، وماشي بالصوت ديالو غادي يغير ولكن نمط الإنتاج والتغيرات الإقتصادية والدولية هي لي كتغير ، ملي غادي يبغيوه يتخونج غادي يتخونج ملي غادي يبغيوه يتعلمن غادي يتعلمن .

أنا ضد العدالة والتنمية وضد الخوانجية والمتدينين بصفة عامة ( من غير الواليدة )، ولكن أيضا ضد تزوير الحقائق وضد الإبتذال وضد الإرتذالية ، وضد هاد الصفاقة وهاد الإستصغار ديال المتلقي من طرف هادوا لي كيدعيونا نصوتوا باش نحاربوا الظلام ، الظلام جابوا المخزن وملي غادي يبغي يحيدو غادي يحيدوا سواء صوتنا ضدو أو لا.

موضوعات أخرى

28/03/2024 10:30

وشوفو التلاميذ كيولاو.. تلميذ شرمل إداري بثانوية فسلا وشرك ليه وجهو وباقي داخل خارج للمدرسة وغليان وسط أسرة التعليم فالمدينة

28/03/2024 10:20

أزمة كليات الطب والصيدلة مزال غادية.. مجلس طلبة الطب بفاس: النضال ديالنا مستمر ومقاطعتنا المفتوحة قائمة

28/03/2024 10:00

تمويل مول “الشروق”. بوصوف باغي يخلع القضاء بالرسالة الملكية: غير خرج خبار التحقيق معاه نشر رسالة للملك فالفايسبوك وسبونوسوريزياها

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون