الرئيسية > آراء > آشمن مسيرة مليونية لنصرة الرسول ؟ آ جلسو الله يرحم الواليدين نتناقشو بطريقة حضارية واش لي دوا على الدين خاص نقطعو ليه لسانو ؟
23/10/2016 16:11 آراء

آشمن مسيرة مليونية لنصرة الرسول ؟ آ جلسو الله يرحم الواليدين نتناقشو بطريقة حضارية واش لي دوا على الدين خاص نقطعو ليه لسانو ؟

آشمن مسيرة مليونية لنصرة الرسول ؟ آ جلسو الله يرحم الواليدين نتناقشو بطريقة حضارية واش لي دوا على الدين خاص نقطعو ليه لسانو ؟

سهام البارودي كود /////

هادي عاماين فموريتانيا لي مابعيداش علينا بزاف، تحكم على شاب موريتاني محمد شيخ ولد محمد بالاعدام حيت كتب مقال ينتقد فيه بعض الأحداث التاريخية لي وقعات فعهد الرسول و الصحابة و الناس شافوها على أنها فيها مساس و “استخفاف” بالرسول.

فمصر، لي تاهي مابعيداش علينا بزاف كاين واحد السيد سميتو “إسلام البحيري” متابع بتهمة “ازدراء الأديان” مليوح فالحبس حيت ناقش أمور من الدين.
فالسعودية كلشي سمع على قضية المدون رائف بدوي لي محكوم بالسجن 10 سنين و واحد البركة ديال 1000 جلدة كايصرفو ليه فيها كل سيمانة شوية و لي بالرغم من تدخل هيئات دولية، حقوقية، و حملات تضامن واسعة ! رائف بدوي مازال مشدود و مازال كاياكل المشويطة كل سيمانة علاش؟ حيت تاهوا تجرأ و ناقش أمور من الدين من بينها الغاء هيئة الامر بالمعروف و النهي عن المنكر.

و منذ قديم الزمان و أي واحد كايحاول يناقش الدين كايتسلطو عليه السيوفة من بن رشد مرورا بفرج فودة و اللائحة طويلة ديال بنادم لي تقتل و تعدم و تغدر نهار حل فمو و بغا غا يناقش ! وا غاااااااا يناقش! طارو عليه و غبروه و محاو ليه الأثر .علاش ؟ بغا يناقش.

عندنا حنا، مؤخرا ناض واحد الصداع كبير على واحد المقال كتبو كريم القمش فجريدة آخر ساعة ! حيت قالك آ سيدي كريم القمش تعدا على سيد النبي و وصفوا بأوصاف تزيل
عنه هالة القداسة و قال عليه أنه زير نساء و و و …

لي قرا المقال ديال كريم القمش غادي يبان ليه بأنه داكشي لي تمارس على هادوك لي ذكرتهم فالأول ديال المقال من بن رشد و نتا هابط كايحاولو يمارسوه هاد الناس اليوم على “القمش” باش يزيدو سمية جديدة فالليستة ديال الناس لي كايبغيو يناقشو الدين و كايسكتوهم، السيد ماجابش شي حاجة من راسو هو فقط جبد أحاديث مروية عن الرسول فصحيح البخاري و مسلم و الترمذي، أحاديث كاتوصف الحياة الشخصية للرسول و الزيجات ديالو و حتى العلاقات الجنسية ديالو و ناقشها و اعتابر أنها (الأحاديث) هي لي كاتسيئ للرسول و أنه التواجد ديالها كايضر بصورة الرسول لي تقال فيه ” و إنك لعلى خلق عظيم”.

كاينة أحاديث أخرى و روايات فالصحيحين كاضر بليماج ديال سيد النبي أكثر من داكشي لي هضر عليه القمش. احاديث رواها البخاري والنسائي واحمد ماشي روته سهام البارودي ولا روته كوود.

اليوم أكثر حاجة كيضر بالأسلام هوما المتأسلمين لي كابغاوناش نزيدو القدام و نديرو إعادة قراءة للثرات بشكل منطقي، دوك الناس لي بغاو الاسلام مايتطورش و مايتنقحش باش يساير العصر، و لي غي كاتجبد ليهم حس “إعادة القراءة” كاينوضو كايغوتو ، وا راه داكشي كاين فكتب السيرة آ عيباد الله لابغيتو تحاسبو عليه خاصكم تحاسبو لي رواو الحديث ماشي لي جبدو ليكم و فكركم بيه، و لكن علاش هاد الحرب كاملة كاتنوض على أي واحد كايبغي يناقش أمور من الدين؟

القضية بكثر ماعندها طابع نفسي و طابع اجتماعي كاين عندها واحد المحرك اقتصادي و سياسي كبير،

حيت تجار الدين ماشي فمصلحتهم الناس توعى شوية! حيت دوك الدعاة ديال الفضائيات لي كايتخلصو بالريال السعودي و الريال القطري و كايتخلصو على الساعة ديال الرقية الشرعية بربعالاف ريال و كايبيعو الما مقري عليه القرآن ب100 درهم للقريعة، ماباغينش الناس لي تابعينهم يوعاو و يعرفو و يناقشو، الدعاة لي كايبقاو على المريدين ديالهم بأنه الزهد فالحياة الدنيا ضروري و أنه الفقراء يدخلون الجنة و هوما عايشين وسط القصور و كايسوقو الرانج روفر بدعم من آل سعود و فاش الدرويش كايسولو كايقوليه ” و فضلنا بعضكم على بعض في الرزق” و كاينسى يقوليه” المال و البنون زينة الحياة الدنيا”، دوك الدعاة لي فاش كايتاصل بيه شي شاب كايقوليه راني باغي نتزوج و ماعنديش باش ! ماعندي خدمة ماعندي قراية ماعمرك غاتسمعو كايقوليه سير قرا و جيب موسيو فالباك و دفع لي كونكور و دير الفلوس باش تعيش و تربي الريش لا لا كاتلقاه كايقوليه عليك بالاستعفاف و الصلاة ! في حين الداعية براسو مزوج مع راساتو جوج عيالات و لا ثلاتة و لا ربعة كاع و مدور بيه الحريم ديال السلطان سليمان القانوني و جالس كايفتي على واحد مسكين غايخرج ليه المني من ودنيه بشنو ؟ بالاستعفاف و الصلاة.

نفس الدعاة و المتأسلمين المنافقين لي كايبقاو على العقول الضعيفة نهار كايمرض شي واحد “عليك بالعسل فإنه شفاء” “عليك بالحبة السوداء فإنها شفاء” ، نهار كاتعيط ليهم شي مرا فالراديو كاتقوليه راه عندي اكتئاب شنو ندير؟ عوض مايوجها لعند طبيب نفسي حفا دماغو فالقراية على علم النفس و عندو خبرة فعلاج فحال هاد الحالات سي الداعية لي كايفهم فكلشي من النووي حتى لآداب دخول المرحاض كايقوليها سيري قراي القرآن و نشاعالله غاتفاجاي في حين هوا نهار كايمرض و لا نهار كايمرض ليه ولدو كايشد أحسن طيارة و كاتلقاه هوا الأول مجبد فشي ناموسية فشي سبيطار بزبالة د الفلوس فباريس و لا لندن و لا ميونيخ و خلا العسل و الحبة السوداء و الما للدراوش باش يداويو بيهم الكونصير.

هاد الناس هادو لي مادوزو امتحانات فالفيزياء و كايهضرو عليها ! ماشفناهم كايقراو فكليات الطب و كايناقشو فالطب! ماعرفنا عليهم أنه كانو فشي معهد من معاهد النازا كايقراو

باش ولاو تاهوما خاشيين كرموستهم فشريط العلم و الرياضيات و الفيزياء و علم النفس و كايفهمو فكلشي من السياسة و الاقتصاد، هاد الناس لي واكلين الخبز بالدين و ماباغينش أي حاجة لي غاتحيد ليهم هاد البزيزيلة، هاد الناس لي ديرونجاهم كريم القمش بدوك الأحاديث لي جبد عوض ماينوضو كايغوتو و كايبينو للعالم أنهم “ظاهرة صوتية” و يكفروه و يبغيو يخرجو فمسيرات مليونية دفاعا عن النبي (و لي بالمناسبة ماعمرنا شفنا فيهم هاد الحماس و خرجو فشي مسيرة مليونية على التعليم لي عندنا فيه سبعين تلميذ فالقسم، جوج جالسين فوق الطبلة و تلميذ فوق الحديدة) و لا مسيرة مليونية لإصلاح قطاع الصحة لي العيالات كايولدو فبيبان السبيطارات ، من الأحسن ليهم مايبقاوش ديما يمارسو داك الهروب إلى الأمام، و أنه يتناقشو مع داك السيد و يوضحو ليه و لينا نظرتهم للأمور و لاكان هوا مافاهمش يفهموه هادشي علاش كاينة شي حاجة سميتها حرية التعبير، باش يتخلق جدال مجتمعي و حركية تخلي الناس تفهم و تستوعب و تعرف ماشي غي تبع كي الحوالا! راه زمان الأنتيرنيت هادا ، و كل حاجة خاصها تتناقش و تتنقح و تتنقا.

و أطونسيو هاد الكلمة ديال حرية التعبير خاصك تفهمها مزيان قبل ماتبدا تشلض فيها حيت بانو ليا بزاف ديال الناس لي محسوبين على التيار الإسلاموي السياسي الشعبوي غاكايشيرو بهاد المفهوم و فاش كايقوليك كريم القمش كافر زنديق خارج عن الملة” ! كاتقوليهم آ سمحمد الله يهديك راه كاتحرض على الراجل ! كايجاوبك ” وا هادي حرية التعبير ! وا عطيوني حرية التعبير! ياك نتوما لي كاتناديو بحرية التعبير واش حلال عليكم و حرام علينا؟”

لا آ سمحمد ! هادشي لي كاتقول فيه نتا سميتو التحريض على القتل و الحاق الأذى بالشخص حيت فبلاد نسبة الأمية فيها واصلة تال زداكاداك و بنادم غا على نبشة يقدر يتفركع عليك باش تجي نتا تدغدغو و تقوليه “راه كريم القمش كايعاير النبي” و تكفرو و ترضو شيطان قدامو و تبقا عليهم فالفايسبوك و الجرائد نطالب الناس بأن تتحرك دفاعا عن النبي “إلا الرسول” “فداك روحي يا رسول الله”! شنو كاتسنى ؟

كاتسنى يخرج شي معتوه سايط ليه الريح فراسو و شبعان أفلام ديال “اصدارات الدولة الاسلامية” يتلقا ليه فالزنقة و ينزل عليه بشي شاقور للراس دفاعا عن سيد النبي؟

راه هذا هو الارهاب بعينه ! ماشي بالضرورة تفركع عليا فشي بار و لا طيح ليا التوين سانتر بشي طيارة باش تسمى ارهابي! الارهاب هوا تسد ليا فمي و ماتخلينيش نهضر و لا هضرت تكفرني تجيش ليا الجيوش ديالك و طلقهم عليا.

بهاد التصرفات راكم غي كاتزيدو تعطلونا واحد 100 عام لقدام عوض مانجلسو فوق الطبلة و نتناقشو و يتحل باب الحوار و تكون دينامية فالدين غانبقاو العام لي جا لي دوا نقطعو ليه لسانو.

موضوعات أخرى

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة

28/03/2024 14:22

تعيينات جديدة فمناصب عليا دازت اليوم فمجلس الحكومة: منهم مدير المحروقات ومدير الموارد البشرية فوزارة الخارجية

28/03/2024 14:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 13:30

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد

28/03/2024 12:45

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر

28/03/2024 12:30

من هنا لسيمانة.. اللي عندو شي طوموبيل أو موطور ففوريانات كازا ومجاش سحبهم غيتباعو

28/03/2024 12:20

جنايات فاس فرقات 33 عام ديال الحبس على ريزو د التهجير السري وها التهم اللي تابعوا بها