كود سهام البارودي /////

قبايلة قريت بلي البوليس ديال المانيا تعرفو على الجنسيات ديال دوك الدراري لي تعداو على الألمانيات و لقا بلي الأغلبية مغاربة و جزائرين ! طبعا مغاربة و جزائرين و كون جات عليا أنا مايحتاجو لا تحقيق لا بوليس! من نهار تنشر خبر الاعتداء و ضلوع خروب بلادي فهاد القضية كان واضح و باين !

المشكلة الكبيرة أنو ولينا كانشوفو جيل جديد ديال الحراكة اليوم فأوروبا ! خلي عليا داك الجيل القديم شحال هادي كان الحراك كايمشي من العونات و لا لفقيه بنصالح و لا بني ملال كايوصل لشي قنت فأوروبا ! كايتخبا و كايضرب الطم ! عارف راسو هو المبارك لي وصل لديك البقعة الطاهرة ! حاس بالمسؤولية لي تابعاه ! عارف الوراق صعاب و خاصو ينوض يضبر على راسو يخدم فالنوار و لا يضبر على شي كاورية دير ليه الوراق تايحن الله ! باش يدخل البلاد فشهر ثمنية جايب فاركونيط معمرة بالتيليفيزيونات و الماكينات د الصابون و الشكلاط و الفرماج و الباكيات د القهوة و البشكليطات الفوق و شي سبرديلة طالبها ليه ولد ختو … هادو كانو الحراكة ديال شحال هادي! بنادم كايحرك باش يضبر على طرف د الخبز و من كايوصل و هو مخبي و حاني راسو ! الهم ديالو هو يضبر فخديمة و يقاد لوراق. الجيل ديال الحراكة لي هربو فالثمانينات و التسعينات و رجعو البلاد اليوم حلو القهاوي و الحمامات و الحوانت …

اليوم ولينا كانسيفطو جيل جديد ديال الحراكة ! جيل خطير ! مشمكر ! قادوسي اووه شحال فيه ديال الفهامة ؟ بغاو يفهمو فالسياسة و الدين و البلا بلا… و ماعندو تا مؤهلات باش يندامج وسط المجتمع الأوروبي ، و فاش كانهضرو على المؤهلات راه ماشي بالضرورة تكون شاد الدوكتورا باش تندمج فأوروبا ! كانهضرو على الحراكة المانوفريا ! ماشي المهاجرين صحاب الشواهد و الديبلومات و لي كايمشيو يخدمو فالبيرو !

بالنسبة للحراكة المانوفريا من بعد ماكنا كانصدرو حراك داخل سوق راسو باغي يصور طرف د الخبز و يدخل للبلاد ! ولينا كانصدرو حراكة هايش مايش ، ماكايعرفو يهضرو ماكايعرفو يتعاملو ! الحرتوكة ديال المغرب وصلات لألمانيا و اوروبا و طبعا دات معاها ديك الضسارة ديال المغرب ، و التقوديس ديال المغرب،ولينا كانشوفو حراكة مغاربة كايخورو الألمانيات ! حراكة مغاربة كايسبو البلاد و النظام ففيديوات و كايلوحوهم فالفايسبوك ! ولينا كانشوفو حراكة ضاسرين لدرجة كاينتاقدو العيالات العربيات و المغربيات فأوروبا قالك “قليل فيهم لي دايرين الحجاب ” وا تصنط آبعرور ! شوف دخول الشبوقات كي داير ! شوف الفرق شحال كبير بين الجيل ديال الحراكة لي كانو كايتصنطو للشاب خالد و الجيل ديال الحراكة لي كبر مع “عمرو خالد” ! ماشي بالضرورة سمع لعمرو خالد و لا عرفو و لكن عاصرو ، عاش فوقتو … الحراكة اليوم بغاو يديرو ديك القضية ديال ” دخلتو من القطرة … دا ليا المرا”

لي خاص يفهمو هاد الدراري لي ختارو يهاجرو اليوم ! هو راه خاصهم يسلخو ديك الجلدة لي داو معاهم من هنا و لي عامرة عقد و احكام مسبقة و ضسارة و بسالة و حكرة ، يسلخوها و يحاولو يديرو جلدة جديدة ! راه أصلا ماكانصدروش لأوروبا شي حراكة كايحمرو الوجه ! قاريين و واعيين و لغات كاتشتت و الديبلومات … كانصدرو المانوفريا ، و على الأقل على الاقل المانوفريا ديالنا يدخلو سوق راسهم و مايشوهوش براسهم و بالمغاربة لي لهيه ! لي عايشين تما هادي سنين و لي باغين ياكلو طرف د الخبز في صمت ! اليوم الهجرة عندها شرط أساسي هو الاندماج داخل المجتمع، الانصهار داخل المجتمع ، يعني دينك و ثقافتك و هويتك خليهم عندك ماعند الناس مادير بيهم ! أما دوك العقد و الأمراض و الأحكام و تاقادوسيت هاديك خاصك تلوحهم فالبحر ! و مع أول عفطة ليك فأوروبا ضرب سباطك مزيان مع الارض و سوس منو آخر حبات ديال الداعشية لي فيك !

الدراري لي وصلو لألمانيا مع الأفواج ديال السوريين ماكايبشروش بالخير ! بعيدا عن ديك الهضرة العاطفية ديال مالقاوش لي يعاونهم هنا و الله يسهل عليهم و مساكن و كدا … ايه الله يسهل عليهم غي يكونو رجال و يندامجو مع المجتمعات لي مشاو ليها و باراكا من التقوديس راه اصلا كونك عربي مسلم راك شخص غير مرغوب فيه فأوروبا ! و عاد زيد عليها عربي و مسلم و موسخ و قادوسي و مجرم كاتتعدا على العيالات و يصحبك الحرية هي تطلع لبنادم فوق راسو و تخرا … راه السطاج اللخر ديال البسالة وصلنا ليه مع أوروبا و خلاتها أم كلثوم ” للصبر حدود … للصبر حدود “!