كود اسماء غربي ////

المشكلة لكبيرة اللي وقعات نهاية الاسبوع الماضي مع “فرانس 24” مولاها هو مدير مديرية الاعلام بوزارة الاتصال السي عبد الاله تهاني. هاد السيد اللي عندو قدرة كبيرة يضارب الصحافيين وماديها غير باش يرسل هادا يكتب ضد هادا بغبائه الكبير اتصل بالشركة المنتجة لبرنامج “حديث العواصم” اللي كيقدمو جمال بودومة. كال ليهم ايلى درتوه٬ وكان هاد الشي نهار الخميس الفايت والتسجيل مبرمج الجمعة٬ غادي نجيب ليكم البوليس وفق ما اكده مصدر ل”كود”.

بتبعكيك فيه مستوى مخزني وضيع تكلم هاد السيد. اولا البوليس ماشي ديالك وما فراسش الحموشي باللي وليتي باطرون على هاد الجهاز اللي ماشي سايب. راه دولة فيها قانون. كيفاش مسؤول فوزارة الاتصال وبلا خبار حتى الناس لكبار فالدولة٬ وهاد الشي تاكدات منو كود٬ يقبل على تصرف يشوه دولة.

من بعد ما قودها مزيان مشى كيتصل بالصحف باش يعطي وجهات نظرو اللي ماشي هي وجهة نظر لا المغرب لا الحكومة لا وزارة الاتصال. قال باللي البرنامج ما عندوش ترخيص. على من كتضحك. فين عمر برنامج حديث العواصم كان عندو ترخيص. كان كيتصور نهار المغرب يتقلق كيف الحلقة اللي كان فيها الساخر احمد السنوسي كيوقفو.

وناض قال باللي الصحافي بالعربية ما خدامش مع “فرانس 24″ وما عندهمش رخصة. القضية وما فيها ما حاملينش الاسباني اللي عندو شركة الانتاج. ولكن شكون هو حتى يحمل ولا ما يحملش
انتقادو ل”فرانس 24” يظهر بصري كبير داخل فيه. باغي كاع قنوات العالم تكول اللي بغاه سيادتو. يا هادا راه الاعلام حر ايلى عندك شي مشكلة راها فيك ماشي فالاعلام اللي كيدير خدمتو

تصرف شوش على زيارة ماكرون للمغرب. واش بحال هادا كيبغيو المغرب كيدافعو على صورتو؟ اللا بحالو كيضرو الصورة كيخسروها كيشوهوها. هاد السيد خاصو يمشي فحالو حقاش طول وحقاش مخزني بزاف بزاف بزاف وباش تكون بحال هاد العينة كيولي يتصرف من راسو ويسيء للدولة للمغرب وللمخزن اكثر مما ينفعه. بحالو بحال اللي كيقول كيحميه اللي هو الناطق الرسمي باسم القصر الملكي اللي ما عمرو نطق واسمه عبد الحق لمريني.