الرئيسية > آراء > مذكرات لاجيء ف بلجيكا،الحلقة12:”الملائكة لا تحلق فوق باريس”
19/06/2017 11:19 آراء

مذكرات لاجيء ف بلجيكا،الحلقة12:”الملائكة لا تحلق فوق باريس”

مذكرات لاجيء ف بلجيكا،الحلقة12:”الملائكة لا تحلق فوق باريس”

 

نوفل الشعرة- كود
ف احدى الرحلات الرابطة بين بروكسيل و فالينسيان الفرنسية.. ركبت فالكرسي الاول المقابل للسائق..و حيت الحرب خدعة حطيت نظاراتي الطبية باش نحاول ما امكن ما نبانش حراك نموذجي يسهل اصطياده..و حطيت السماعات ف ودني و مرة مرة كنت ما كننساش نحرك راسي زعما انا منغم بالموسيقى..رغم انهم اصلا ما ملصقينش مع التلفون ..للي شادو بين يدي باش نتبع “الجي بي اس” و نعرف واش فت الحدود و زال الخطر و لا باقي ..خففت شوية من اللحية و لبست التيشورت للي كيبين لي شوية من التاتواج و ما نسيتش نشري باكيا د مالبورو نخليها خارجة شوية من الجيب د سروال للي ف جهة الكولوار باش على الاقل اذا مشيت ما نمشيش للحبس كمشتبه ارهابي ..عيني تا على الطريق رغم اني كنت عارف من كليكة الحراكة ديالنا ان بوليس الحدود الفرنسي عندو بلاصة محددة كيوقف فيها حدا واحد المحطة د الاستراحة  قال لي محمد اني اذا فوتناها بسلام راه لاباس .. مرة مرة كتكتب لي نورين للي عارفاني ف شمن ساعة غادي نوصل و عاملين انا و هي تستناني حدا لاكار حيت رقمي البلجيكي غي غادي نفوت الحدود ( اذا فوتها)  ما غاديش يبقا خدام و ما نقدر لا نعيط لها لا نستقبل مكالماتها..كتقول لي “فين وصلتي” ف كنجاوبها بيدي العرقانين و للي كيترعدو.. و كنرجع دغيا نشوف الكيلومترات لفرنسا و هما كينقصو .. لكن ف واحد الفترة ملي رجعت المسافة اقل من كيلومتر صافي تلفت..بانت لي من بعيد سيارة د البوليس واقفة  ..ف دهشت ..قلبي بدا كيضرب ..و حسيت بنقطة عرق باردة هابطة لي مع ظهري و ما فطنتش تا جبرت راسي انا للي عمري ركعتها كنشهد ..و ملي خفف السائق السرعة زيدت تلفت و بقيت كندور و كنتلفت كنشوف واش كاين شي وجوه فزعة من غيري و نشوف تا منين نهرب اذا وقفونا ..فكرت ف اني نعمل راسي ناعس باش اذا طلعو ما يفيقونيش زعما لكن تفكرت اني نقدر ننعس لهم بالصح و تا نفتح عيني يتصرفيقة د بوليسي ب موسطاج ف مطار بن بطوطة د طنجة..ف فكرت بذكاء شخص مغربي و الكار كيقرب اني نجبد الهدرة مع العجوز للي حدايا باش نبان تا انا فرنساوي ..لكن العجوز شاف فيا ملي قلت لو بالتلفة ” السلام عليكم” ب نظرة كتعني ” قود” ..ف زيدت تلفت ..و جبدت كتاب ..تفكرت انه مكتوب بالعربية غادي غي يغرقني ..رجعتو..عملت غنية ..بدا كيحرقني قلبي .. تكمشت فالكرسي و تمنيت ان ختي يكون عندها الحق هاد المرة ملي كانت كتنصحني ب اني نبقا نردد ملي نحصل “صم بكم عمي فهم لا يعقلون” .. رددتها يمكن شي الف مرة و انا ساد عيني ..و احتياطا رددت معاها شوية د الترانيم للي حفظني صديقي ” موحا”  المسيحي و فكرت تا ف بوذا و قلت لو ف نفسي فيما يشبه التواصل الروحي ” انقذني ” ثم عاودتها لو بالانجليزية ” هيلب مي” ..
ثم فتحت عيني ف الاراضي الفرنسية و الكار ماشي مكمل طريقو ما وقفو حد .. استعدت قواي العقلية و ثباتي الروحي..و حسيت براسي شخص خارق قدر يتغلب على القدر و تخايلتني كما عماد النتيفي ملي كان كايخربق المنطق ف جزيرة الكنز ..ف شوفت فالعجوز للي لاحظ ان صدري بدا يولي منفوخ  بنص شوفة محتقرة بما اننا بجوجنا دابا مقيمين ف فرنسا..و تحسست الخمسين اورو للي عطاني محمد على امل منه انه  غادي يصردني ل فرنسا و يتخلص مني للابد..و ما استبعدتش انه يكون ديكلارا بيا للفرنسيين باش يشدوني و يردوني للمغرب..حاذيت الورقة النقدية   في جيبي باطراف اصابعي و حسيت براسي فاحش الغنى ..و فكرت ف انه اذا كان عندي 100 اورو كنت نقدر نعمل مشروع ف فالينسيان نخدم معايا فيه نفس هاد العجوز و نحسن صورة المغاربة عندو..عليها ملي وصلنا ما خليتوش ينزل هو الاول و سبقتو و كنت علاين نقول لو ما تعطلش غدا .. لكن مع اول خطوة برا فالمحطة بان لي بوليسي .. ف عدت ل حجمي الطبيعي و بديت عاوتاني كنشهد ..
تلفت فالمحطة ..للي طلعت ما عندهاش غي باب واحد فحال المحطات ديالنا ف المغرب ..نورين كتستناني ف شي بلاصة و انا عييت ندور كنفتش والو ..مشيت كنفتش على شي قهوة فيها الويفي حيت كان عليا اني نتحرك و ما نبقاش صيد سهل للبوليس يجيو يسولوني على الوراق ..بقيت ماشي تا جبرت راسي فالمدينة ..و جلست ف قهوة حاولت ما امكن نبان قدام النادلة النذلة عادي..طلبت قهوة و سولتها على الكود د الويفي و ملي عطاتو لي  فالمرة الثالتة حيت المرات للي قبل عطاتو لي غلط..جبرت نورين مخليا لي طن د الميساجات..تخلعت و عيطت للشركة د الكار للي جيت فيه و للمحطة و للبوليس باش تعرف واش شدوني ..و خرجت ما بقاتش اونلين فالميسنجر فيما منعم صاحبي ..الوحيد للي عارف اني ف فرنسا..كان قارص و كيستناني غي نبان..ف كتب لي مباشرة ملي شافني اونلين ” لملعوق ..راه كتستناك ف كويك ما عندهاش انترنت..تجبرها مع الباب” ..فتشت على لافتة كويك ..للي بانت لي من بعيد ..اتجهت ليها و وقفت مع الباب لكن ما بان لي حد.. و ملي درت كنتفحص ف وجوه الناس للي دايزين ..بانت لي شي حاجة كتنتمي لي كتشوف فكل بلاصة كتفتش عليا ..دارت شافتني بدون ما تنتبه..ثم رجعت حققت فيا ..قربت هي  ..و انا قربت ..ضحكت ..و تاكدت انه انا ف ضحكت ..و جااات كتجري ..و تلاحت عليا كتعنقني بالجهد..كنبغي غي نشوف الوجه للي كنبغي كتكي عليا بيدها و ما كتخلينيش..كانت كتبكي.
ف ديك اليوماين,معاها .. رجعت نوفل للي كنعرف ..للي كنت كنعرف ..كنقيلو نهار و ليل مع بعضنا و ما مطلوب من تا واحد منا انه يمثل او يكذب ف شي حاجة ..عندنا شوية د الفلوس لكن كانو كيبانو لنا بزاااف ..لدرجة اني غادي نرجع و انا باقي لي الصرف و عصير و شوية د الشيبس ف جيبي..دوزنا الوقت كامل اما متكيين او مخشيين ف بعضنا ..ما كنحتاجوش نهدرو ..و نقدر غي نشوف فيها تفهم و تقول لي واخا ..و ملي كنخرجو كنمشيو فين بغينا و كنعملو للي بغينا و فشي مرات كنكونو ماشين تا كنوقفو..كنتفكر اني ماشي و ما غاديش نبقا نشوفها ف كنعنقها و  كنبقا نبوسها .. عاوتاني نزيدو و توقفني و تقول لي عنقني ..اولا تبقا كتجبد عنقها هي القصيرة ل عندي تا تبوسني و تقول لي : غي حيت نتا حلو..جربنا ف واحد المرة اني نهزها و نبقا ماشي بيها فالطريق و جبرنا اانا نكميو ف غرفة ممنوع تكمي فيها .. تا ديك التصاور الانساغرامية للي كيعملو لي كوبل عملناهم ..و صردنا وحدة باش ينشرها واحد الكونط فانستغرام مشهور.. لكن ما نشرهاش و بلوكانا حيت صدعناه..ف  نورين حطات وحدة اخرى عندها.. ديالنا و انا مصورها من اللور و هي ماشا متقدماني شادا لي ف يدي..كنا كنفطرو ملي سولتني واش ديك الهدرة للي قلت لها ف واحد المرة اني نقدر ندفع اللجوء باقي كنفكر فيها ..ف قلت لها اه علاش لا ..على الاقل نبقا حداك هنا .. بدينا كنفتشو على المعلومات ف فالانترنت تا جبرنا راسنا غدا فالصف كنستناو الدور ديالنا ف ” الاوفبرا” .
طلبت اللجوء و عطاوني موعد نرجع بعد اسبوع باش نبصم و نبدا رسميا اجراءات اللجوء.. ما كانش عندي فلوس كافيين باش يغطوا الاقامة ل سيمانة ف فالينسيان ..ف اتفقنا انا و نورين اني نرجع لبروكسيل ..نبقا فيها و نرجع بعد اسبوع نقدم فالمركز و نبقا فسونتر اللاجئين ملي نبصم ..اما ف فالينسيان او ف اي مدينة قريبة ..المهم حدا نورين ..رجعت ل بروكسيل ديك الاربعاء فسيارة مع بلجيكي جبرناه بواسطة “بلا بلا كار” التطبيق للي كيخليك تمشي مع الناس ف سيارتهم ف اوروبا ب ثمن بسيط .. و ملي وصلت و شاف فيا محمد ب خيبة امل ..بشرتو و قلت لو اني غادي ما نبقاش معاه و اني صافي قررت نغادر الاسبوع الجاي ..شجعني على الفكرة و قال لي اني على الاقل غادي نربح وقت على ما يدرسو الملف ..نكون جبرت حلول اخرى قبل ما يعطيوني الرفض..مر ديك اليومان دغيا ..انا كنت كنستنا السيمانة تدوز ..لكن نهار الجمعة فالعشية ..قبل ما نسمعو النبأ ..جالسين كنتفرجو الكرة ..كيعدبنا محمد و كيفرجنا ف بلجيكا لاعبة فالتلفازة..كنتابع معاه و مرة مرة كنشوف فالفالبز للي عطاني باش نجمع فيها شوية د الحوايج للي غادي ناخد معايا ..تا صونا تلفوني و ظهر الخبر : ” انفجار ارهابي في باريس”.
ف سدت فرنسا الحدود…و ما قدرتش نمشي للموعد.
————————————————————-
الحلقات السابقة:
– ( الحلقة الاولى : http://bit.ly/2s3GmGK )
– ( الحلقة الثانية : http://bit.ly/2rAO2mR )
– ( الحلقة الثالتة : http://bit.ly/2rXOVp7 )
– ( الحلقة الرابعة : http://bit.ly/2sERrxk )
– ( الحلقة الخامسة: http://bit.ly/2rVT9xW )
– ( الحلقة السادسة : http://bit.ly/2skjpll )
– ( الحلقة السابعة : http://bit.ly/2rdle40 )
– ( الحلقة الثامنة : https://goo.gl/Xo4Vox)
– (  الحلقة التاسعة : http://bit.ly/2scqZvW )
– (  الحلقة العاشرة : http://bit.ly/2s5mRPP )
– (  الحلقة الحادية عشر :  http://bit.ly/2tdLF6X )

موضوعات أخرى

29/03/2024 14:10

ها المعقول..استثمار صيني كبير فالمغرب بـ3 مليار درهم لانتاج بطاريات السيارات الكهربائية غايوفر 2500 منصب شغل وبلادنا هربات على لالجيري فصناعة السيارات

29/03/2024 14:00

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 13:45

تفاصيل حصرية على وضع منسقة جهوية لحزب سياسي بجهة فاس مكناس فالحراسة النظرية: خدات من الضحايا فلوس صحيحة وصلات 18 مليون والمدير الجهوي ديال الضرائب هو اللي فضحها

29/03/2024 13:30

الجيش الإسباني غاد يوسع المنشأت العسكرية ف سبتة ومليلية وغيجهز مراكز خاصة للتدريبات والمناورات لسلاح المدرعات

29/03/2024 13:21

تقرير رسمي: أسعار الصناعات الغذائية فبلادنا تراجعات وإنتاج وتوزيع الما والضو مستقر

29/03/2024 13:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟

29/03/2024 12:30

السلطات المغربية قبلات العودة ديالهم.. گاع الحراگة اللي استغلو الموڤيطا ديال الثلاثاء الفايت وحرگو لسبتة رجعو