كود كازا ///
الخطاب ديال محمد السادس فعيد العرش طحن القطاع العام وطلع بالقطاع الخاص. قطاع ماشي مزيان مزيان. فيه بزافت الديفو. كيضحكو على الناس كيتعطلو على الخلاص ضدا على القانون كيتهربو من الضرائب ما كيخلصوش للمواطنين قوانينهم كالضمان الاجتماعي وما شابهها.
هاد الشي ماشي مهم. نعاود ليكم قصة وقعات ل”كود”. حكايتها فظروف اخرى كانت غادية تكون غريبة ما عندها معنى. لكن بعد الخطاب ديال عيد العرش اجيو تكتاشفو اللي كتعانيه مقاولات الصحافة الالكترونية مع فئة من الوكالات. كتاخد 30 بالمائة على خدمة ما هازة ما حاطة.
فالقانون خاص الوكالة تخلص على كل اشهار كتختار ديرو فشي مؤسسة اعلامية 60 يوم بعد ما كان 90 يوم من وضع الفاكتورة. هاد الوكالة اللي باغية تشفر “كود” معروفة بزاف بزاف بزاف فكازا اسمها “ساگا”. مولاها اسمو شكير الفاسي الفهري. عندو مؤسسات عمومية وشركات خاصة بحال “الشركة الوطنية للاستثمار” =الهولدينك الملكي= باش تعرفو عقلية هاد القطاع الخاص. فرحان ومعتقد انو يقدر يغمق على عباد الله وما يخلص حد.
المهم هاد الشركة عندها شركة اخرى اسمها “اوكيلفي” مكلفة بالاشهار فالانترنيت ومنها الصحف الرقمية. طلبات منو مؤسسة عمومية يدير اشهار هادي اكثر من عام. داز الاشهار وباش جا لخلاص كل نهار وكذبة. شكون المدير المالي هو ولدو يوسف. هاد الشي سوقهم مادام شركة خاصة. المهم مشى المدير ديال هاد “اوكيلفي” وبقاو الناس ما مخلصينش. جابو واحد التافه حتى التلفون ما كيردش عليه. بدلو الادارة وكل نهار كيكذبو على عباد الله. هاد الشي على مبلغ ماشي كبير. ماشي بحال المبالغ اللي كيعطيها امثالو لموقع الماجيدي او غيرو اللي كياخدو بعض المرات 500 بالمائة اكثر من اللي كتاخدو مواقع اخبارية اخرى. واييه
كيف قلت هادي امور عادية كتوقع لجميع المؤسسات الاعلامية غير دابا كاين واحد تمجيد بزاف للقطاع الخاص. راه ماشي بصاح. راه مكرفص بزاف على القطاع العام. كيربحو اه بزاف بزاف. الضرائب كيخلصو قليل بزاف بزاف. هاد الشي حادكين فيه. الفضيحة هو كيربحو بزاف من القطاع الخاص. بحال هاد خينا اللي دار عرسو فمراكش وجاتو الدولة العميقة والسطحية.
