الرئيسية > آراء > في إطار موازين: الحماق هادا ! الفنان المغربي و عقلية اللقيج و السعاية ! واش باغي يتخلص قد نجم عالمي هوا ماعندوش نفس الجمهور لي عندو ؟!
19/05/2017 09:23 آراء

في إطار موازين: الحماق هادا ! الفنان المغربي و عقلية اللقيج و السعاية ! واش باغي يتخلص قد نجم عالمي هوا ماعندوش نفس الجمهور لي عندو ؟!

في إطار موازين: الحماق هادا ! الفنان المغربي و عقلية اللقيج و السعاية ! واش باغي يتخلص قد نجم عالمي هوا ماعندوش نفس الجمهور لي عندو ؟!

سهام البارودي- كود

بزاف ديال المغنيين غي كايشدو الميكرو فشي برنامج و كايعطيوها للشكوى و كايطرحو واحد السؤال كايجيني شخصيا من أغبى الأسئلة لي عرفهم التاريخ ” علاش آ سيدي ملي كايجيبو مغنيين من ميريكان و لا لبنان و لا مصر كايعطيوهم الملاين و حنا الفنانة المغاربة كايعطيونا ” التفرتيت”
لي ماكايبغيوش يفهمو هاد النوع ديال الفنانة أنه الخلاص ديال أي فنان ماشي صدقة باش نطبقو فيها ” صدقة صدقة في المقربين أولى” ، علاش كاطيحو براسكم و كاتبداو تبانو فحال دوك البراهش لي مامعروضينش للعرس و كايساينو يخرجو ليهم دار العروسة شوية د الخبز فيه الدجاج و الدغميرة؟! الفنان كايتخلص على قد الشهرة لي عندو ! على قد القاعدة الجماهيرية لي متبعاه عبر العالم ! قد ماعندك ديال الجماهير ! قد مانتا مطلوب ! فالاشهارات و فالسهرات و فالمهرجانات و قد ما الكاشي ديالك كايطلع !
للأسف قلال المغنيين المغاربة لي يقدرو يقولو أنهم وصلو للعالمية و المشكل مشكل لهجة و حتى ابداع ! و بلا مانهضرو على العالمية ! نشوفو غي فالمنطقة العربية ! ماغاديش نقارنو بين جمهور ” نجوى كرم ” و جمهور “ماجد المهندس”  لي الامتداد ديالو من المحيط إلى الخليج ! فنانين لي عندهم جمهور فگاع البقاع ! من لبنان ! سورية ! مصر ! الخليج ! و الجالية العربية فالقارات الأخرى ! و فنان مغربي ايكس الجمهور ديالو محدود فشويكيك ديال للمغاربة داخل المغرب مدردرة عليه نغيزة ديال الجالية لي گلبها طايب بالحنين للبلاد و الميمة و خبز الشعير، ! هنا و هناك !
ويز خليفة !بوبا ! نجوى كرم! ماجد المهندس ! كايمزكو الناس عبر العالم ! فاش كاتمشي للحفلة ديالهم كاتشوف المغاربة و حتى الجاليات الأخرى لي عايشة فالمغرب جايين يحضرو ليهم عكس فاش كاتمشي تفرج ففنان مغربي فالمنصة ديال سلا، و لي الجمهور ديالو ماكايتعداش حي كريمة و ولاد سيدي موسى و ساكنة بطانة ….
فنانين مطلوبين و عندهم جمهور كبير و سانيين كونطرات مع دور انتاج عالمية، المستوى ديالهم الفني كايحتم عليهم يطلبو كاشيات كبار ! نتا فنان الجمهور ديالك ماكايفوتش لاكس كازا الرباط حيت كاتغني بالدارجة و لا فنان كاتغني بالأمازيغية و لا فنانة متخصصة فالعيوط و السواكن ماعندكش لاش تقارن راسك بنجوم عالمييين و اقليميين ! الصيت ديالهم واصل لأقصى أدغال افريقيا!
و ماشي مطلوب من المغاربة يعيطو ليك لأي فيستيفال كاين ! راه هاد القاعيدة ديال السعاية و اللقيج خاصها تحيد من عقلية الفنان المغربي ! عقلية ” عاونو الفريق” !! ماتسعاش باش تمشي لمهرجان ! و ماتسعاش باش تخلص اكثر ! و ماتحطش اصلا راسك في موضع مقارنة مع نجم عالمي نتا ماشي قدو و دير فراسك الضحك ! و راه ماشي مشروط علينا نشوفوك فموازين و تيميتار و مهرجان خريبگة و سهرات الصيف ديال ماروك طيليكوم و السهرة ديال دوزام نهار السبت ! راه مايمكنش ! لا جهد إلا جهد الله !
خليونا نشوفو نجوم عالميين كانشوفوهم غي فالتلفزة و اليوتوب و نتسنطو لستيلات و أغاني مختلفين راه ليس بالشعبي و الغرناطي و أحواش وحدهم يحيى الانسان !

موضوعات أخرى

29/03/2024 09:42

السينمائيون يهاجمون بنسعيد: كاين تراجع فالمكتسبات للي تحققات فحكومات سابقة وخاص حوار جاد ومسؤول باش نتجاوزو الأزمة

29/03/2024 09:15

الوداد طواو صفحة الناصيري وطلعو البرناكي كرئيس 20 فتاريخ النادي ودارو مليون للي بغا ينخرط

29/03/2024 09:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟