جبن وزير النقل. سولوه على التطبيقات قال ليهم خاص موافقة الطاكسيات الكبار والصغار واخا شي وحدين مشوهين البلاد – فيديو
عن الباييس////
انجزت جريدة “الباييس” بروتري ليونس ابو يعقوب٬ الارهابي اللي قتل 14 شخص ف”لارامبرا” ببرشلونة السيمانا اللي فاتت وقتلو البوليس المحلي البارح الاثنين. بورتريه لشاب ذكي بزاف وحشومي. ولاد حومتو فالبويبلو اللي كان عايش فيه ف”ريبول” ضاحية العاصمة الكاتالانية قدموه بهاد الصفات.
يونس ابو يعقوب تزاد 1995 بمريرت فالمغرب وغير دار 4 سنين عائلتو داتو معاها لاسبانيا. ما عندو حتى علاقة بالمغرب تقريبا. قرا فمدرسة عمومية اسمها “خوان ماراگال” وسط ريبول وكان كيحصل وفق شهادات اصدقائه على احسن النقط. ديما متميز. من بعد قرا فمركز ابات اوليبا وبعد الشهادة قرا الالكترو ميكانيك.
صحابو قالو عليه ب”اللي كان احسننا جميعا” و”كان تلميذ يحتدى به فالدرب والحي”.
عندو 4 لخوت. 3 شقاق وواحد من باه. الحسين اللي تقتل فگامبريلس فهاد الحادث الارهابي شقيقو. كان عايش فشارع سانتا ماكدالينا مع امو غنو اللي قالت اليومية باللي ما سكتاتش بالبكا من نهار وقع هاد الهجوم الارهابي.
صحابو قالوا لليومية الاسبانية باللي كان “ترانكيل ما عمرو كان عندو شي مشكل بحالنا وكان حشومي” واضافو “واليدينا كانو كياخدوه عبرة ومثال يحتدى. فين ما نديرو شي زبلة كيقولو لينا علاش انتوما ماشي بحال يونس”.
الراحل خدم فشركة اسمها “صولداتال” فريبول وكان “عندو الصالير العالي بيناتنا”. الاصدقاء قالو باللي كان عزيز عليه الطونوبيلات. دوز “سيات ايبيزا” و”بي ام” و”سيتروين سي 5″ كما كان عزيز عليه الكورة. لعب مع ال ريبول اف سي” وكان عفريت فالكورة